Universidade Nacional Timor Lorosa’e (UNTL), Gabinete Vise-Reitoria ba Asuntu Estudantís (GVRAE) servisu hamutuk ho Asosiasaun Akadémika Estudante (AAE) kontinua halo preparasaun final ba eleisaun AAE iha nível fakuldade.
Senadu Jerál - UNTL, Cesar J. M. Baptista, husu ba estudante ativu sira hotu atu partisipa iha prosesu eleisaun ne’e, tanba asosiasaun estudantíl iha papél importante iha dezenvolvimentu universidade, liuliu iha nível fakuldade.
“Prosesu preparasaun ba eleisaun liu hotu ona. Tanba ne’e, ami hakarak husu ba estudante sira hotu atu hola parte iha eleisaun AAE nível fakuldade nian iha loron 17 Jullu 2026 no deposita sira-nia konfiansa ba pakote ne’ebé sira konsidera bele reprezenta estudante sira-nia preokupasaun no interese”, hatete Cesar iha Kampus Sentral, Díli (13/07).
Senadu Jerál mos konvida estudante sira atu partisipa iha kampaña kandidatu sira-nian, ne’ebé sei realiza iha loron 15 Jullu 2026 iha fakuldade ida-idak, hodi fó oportunidade ba kandidatu sira atu aprezenta sira-nia planu no programa servisu ne’ebé sei implementa bainhira eleitu.
Iha parte seluk, Vise-Reitora ba Asuntu Estudantís, Profesora Bia Ble Hitu Carvalho de Jesus, hatete katak GVRAE simu ona pedidu husi komisaun eleisaun no fó apoiu durante prosesu preparasaun to’o loron eleisaun.
“Preparasaun sira lao hela tuir planu. Gabinete VRAE simu ona pedidu husi komisaun eleisaun nian no fó apoiu hanesan konsumu ba ekipa servisu, buletin votasaun, urna no nesesidade seluk sira durante prosesu eleisaun”, hatete Vise-Reitora.
Profesora Bia hatutan, depois prosesu eleisaun, reprezentante sira ne’ebé eleitu sei partisipa iha formasaun espesífika ne’ebé sei fasilita husi GVRAE hamutuk ho parseiru sira, hodi hasa’e kapasidade lideransa no jestaun organizasionál.
