Universidade Nacional Timor Lorosa'e (UNTL) liuhusi Faculdade de Ciências Sociais e Políticas (FCSP) nia Departamento de Inclução Comunitário e Social (ICS) nia graduada Antonia de Jesus Martins, agradese ba universidade, tanba promove edukasaun inklusiva nune’e ema ho defisiénsia (EhD), bele asesu ba koñesimentu.

"Edukasaun inklusiva la'ós de'it kona-ba lori estudante sira tama de'it ba eskola ka universidade, maibé oinsá garante katak ami bele partisipa, aprende, no dezenvolve iha ami-nia poténsia ho seguru no livre husi diskriminasaun", dehan Antonia iha Centro Convensoês de Dili (29/06).

Antonia hatutan edukasaun la hili ida ne'ebé hela iha área rural ka sira ne'ebé hasoru limitasaun fíziku, ho inklusaun tanba ne’e kria oportunidade hanesan ba ema hotu atu atinji sira-nia mehi iha futuru.

Iha fatin hanesan Reprezentante Inan-Aman Antonio Martins hatete, ho kontete tebes, tanba bele haree oan hakat ba pasu ida graduasaun ne'e, maske ho kondisaun difisiénsia.

"Ami sente kontente tebes no orgullu, tanba Maski ami-nia oan difisiénsia, nia la para atu aprende, loron ida-ne'e nia hatudu katak esforsu, no luta hodi apoiu husi família bele lori rezultadu di'ak to'o ohin loron", dehan.

Martins mós husu ba família sira hotu atu kontinua hadomi no apoia sira-nia oan, labele haree ba kondisaun difisiénsia, maibé haree ba kapasidade ne'ebé sira iha hodi fó oportunidade ba sira atu aprende no dezenvolve an, tanba sira mós bele hetan susesu hanesan ema seluk.