Universidade Nacional Timor Lorosa'e (UNTL), liuhusi Faculdade de Medicina e Ciência da Saúde (FMCS), Departamento de Medicina Geral, nia graduada Gloriana da C. S. S. Pereira dehan, graduasaun hanesan rezultadu husi esforsu no perseveransa durante estudu no orgullu bele remata etapa akadémika nian.

“Durante ne’e ami aprende buat barak no hasoru dezafiu oioin ami tenki fahe tempu entre estudu, atividade akadémika no atividade estrakurikulár sira. Dala barak ami tenki estuda to’o kalan bo'ot no menus tempu atu hamutuk ho família, maibé ohin ami konsege remata estudu”, Dehan Gloriana hafoin gradusaun solene iha Centro Convenções de Díli (25/06).

Nia hatutan, maske hasoru difikuldade no sakrifísiu barak, konsidera esperiénsia hirak-ne’e nu’udar parte importante husi prosesu formasaun atu sai profisionál saúde ida ne’ebé preparadu no apoiu husi família no motivasaun atu kontinua avansa sai fatór importante ne’ebé ajuda hodi termina estudu ho di’ak.

Goudinho Soares nu'udar aman husi graduada, senti orgullu, tanba oan hatudu esforsu bo'ot durante estudu iha UNTL, inan-aman, mós halo sakrifísiu no servisu makaas hodi apoiu nune'e bele remata estudu no hetan rezultadu di’ak.

"Ha'u kontente no orgullu tebes tanbá ha'u-nia oan konsege remata nia estudu no sai graduada iha área Medisina Jeral, no hakarak hato’o agradeseimentu ba universidade ne’ebé durante tempu naruk fó atensaun no orientasaun ba ha’u-nia oan to’o nia bele remata nia estudu ho susesu", Dehan Goudinho.

Seremónia graduasaun ne'e partisipa husi Prezidente Konsellu Jerál Padre Acácio Domingos de Castro, SDB, Magnífico Reitór Professor Dr. Joviano António da Costa M. Eng, Sívitas Akadémika sira, Parseiru Dezenvolvimentu, Dosente, Funsionário, graduadu, inan-aman no konvidadu sira.