FTAICC retira estudante ESS na’in-51 husi Lautem

Universidade Nacional Timor Lorosa’e (UNTL) Liuhusi Faculdade de Turismo Artes Indústrias Creativas e Culturais (FTAICC) Departamento de Comércio e Turismo (DCT) retira Estájiu Servisu Sosiál (ESS) ne’ebé estudante na’in lima-nulu-resin-ida (51) hala’o durante fulan rua iha Munisípiu Lautem Postu-Administrativu Lautem Suku Com (17/09).

Dekanu FTAICC Profesór Feliciano Quintas do Céu hatete, estájiu ida-ne’e hala’o, tanba halo parte ida husi kurríkulu universidade nian.

“Estudante finalista sira iha obrigasaun atu planeia ESS no Profisionál, tanba ne’e mak durante fulan rua nia laran estudante sira hala’o programa iha ne’e liuhusi servisu fíziku no non-fíziku”, Dehan Profesór Feliciano.

Iha fatin hanesan Xefe Suku Com Sr. Sergio José Cristovão hatete, estudante sira ne’e mai husi universidade ho programa rua hanesan ESS no profisionál.

“Programa estájiu profisionál ne’e, sira hala’o iha guest house sira ne’ebé Suku identifika no hala’o mós programa ESS servisu fíziku no non-fíziku. Programa sira-ne’e lao ho susesu, tanba liuhusi autoridade lokál ne’ebé fó hela indikasaun ba komunidade ne’ebé iha guest house, nune’e estudante sira bele deskobre estuda iha universidade no prátika iha komunidade”, Dehan Xefe Suku Com Cristovão.

Koordenadora ESS Saturnina Ribeiro Guterres agradese ba autoridade lokal ho estrutura no komunidade sira, tanba apoiu ona sira hodi hala’o ESS no guest house ne’ebé oferese fatin hodi hala’o mós estájiu profisionál.

“Lixu fatin sira ne’ebé ami produz ona sai hanesan ita hotu nia responsavél atu kuidadu hodi bele utiliza ba garante sustentabilidade iha suku ne’e”, Dehan Saturnina.

Iha ámbitu despedida ne’e hala’o mós lansamentu mapeamentu turístiku ne’ebé produs husi estudante ESS sira ne’ebe servisu hamutuk ho orientadór sira. Enkuantu ESS ne’e hala’o durante fulan rua hahú fulan 22 Jullu to’o 22 Setembru 2026 kompostu husi grupu rua.

Partisipa husi orientadór sira, Diretór Departamentu, Dosente, Funsionáriu no autoridade suku nian no Eskuadra PNTL Suku Com no estudante sira inklui komunidade sira.