Universidade Nacional Timor Lorosa’e (UNTL) Faculdade de Turismo Artes, Indústrias, Creativas e Culturais (FTAICC) nia kandidatu ba Associação Académica Estudantil (AAE) Marçal Coli de Jesus ho nia estrutura eleitu ba AAE períodu 2026-2028 ho votu (214) liuhusi aprezentasaun programa no eleisaun, iha Kampus Sentral, Díli (17/07).
AAE Eleitu Marçal Coli de Jesus,
agradese ba konfiansa no prioridade ba mandatu sei garante funsionamentu fakuldade ne’e sai ensinu exelénsia iha universidade no koopera ho fakuldade hodi responde ba atividade sira.
‘’Konfiansa ne’ebé imi fó mai ami la’ós atu manan, maibé ne’e responsabilidade ida atu hatutan estudante sira-nia lian ba fakuldade no universidade. Ha’u mós husu ba imi hotu atu bele koopera hamutuk lori fakuldade ne’e ba oin. Ba mós pakote ne’ebé ohin la manan, mai ita ajusta programa prioridade sira hodi implementa iha futuru”, Dehan Marçal.
Iha fatin hanesan, Vice-Reitora Para os Assuntos Estudantís (VRAE) Profesora Bia Ble Hitu C. de Jesus, hato’o parabens ba AAE eleitu ne’ebé asume responsabilidade ba mandatu ida ne’e no maske pakote ne’ebé la manan buka atu koopera hodi servisu hamutuk dezenvolve atividade estrakurrikular ba estudante sira hotu.
“Ba AAE eleitu sira ita sei promove formasaun iha área Inglés, hanoin krítika, lideransa, diskursu públiku, solusaun konflitu, literasia finanseira durante fulan (3) hodi eleva imi-nia koñesementu di’ak atu bele apoiu atividade sira iha fakuldade no iha universidade”, Dhan VRAE.
Dekanu FTAICC Profesor Feliciano Quintas do Céu, parabeniza Estrutura AAE eleitu períodu 2026-2028 nian. Agradese mós ba estrutura anterior ne’ebé durante ne’e kolabora di’ak hodi hala’o atividade tantu estrakurrikular no seluk.
“Ha’u husu ba AAE eleitu atu hatudu imi-nia responsabilidade, kapasidade no integridade nu’udar estudante ne’ebé sai lideransa máximu iha AAE-FTAICC nian, imi hetan konfiansa, tanba eleitor sira haree imi-nia kapasidade, onestidade no abilidade atu alkansa objetivu husi programa ne’ebé imi preve ona iha planu”, Dehan Dekanu.
Partisipa husi estudante Na’in-300 inklui KO no AAE eleitu no sesante, kandidatura ba hato’o programa no eleisaun kompostu husi pakote A eleitu ho votu (214) no pakote B hetan votu (88) no nulu (18).
