Universidade Nacional Timor Lorosa’e (UNTL), liuhusi Faculdade de Medicina no Ciênsias da Saúde (FMCS), realiza Judísiu ba finalista hamutuk 448 ho tema “As Ciências nos Conectam e Protegem as Vidas Humanas em Todos os Lados do Mundo”. Seremónia ne'e realiza iha Salaun Delta Nova, Díli (18/06).
Reprezentante Dekana atual Vise-Dekanu IV FMCS, Profesór Carlos Boavida Tilman, hatete, estudante marka etapa foun iha sira-nia karreira atu kontinua dezenvolve koñesimentu, servisu ho integridade no kontribui ba hadia sistema saúde iha Timor-Leste.
“Juramentu ida-ne’e la’ós de’it serimónia, juramentu ne’e kompromísu profisionál atu hala’o servisu ho dignidade, onestidade no responsabilidade, tanba profisionál saúde sira iha responsabilidade boot ba moris no saúde komunidade nian”, hateten.
Profesór ne'e husu estudante sira atu hatudu kontinuidade prosesu edukasaun no formasaun profisionál saúde iha país, koñesimentu sientífiku, kapasidade hanoin krítiku no karakter profisionál.
Reprezentante Magnífiku Reitor UNTL, atual Administrador Jerál, Profesór José Deonisio Ximenes, M.Cont, hateten estudante sira konsege remata sira-nia estudu no prepara-an atu tama iha mundu profisionál.
“Ohin loron importante tebes, tanba ita selebra juramentu ba estudante sira ne’ebé remata ona sira-nia estudu. Universidade, liuhusi FMCS fó rekoñesimentu ba sira-nia susesu akadémiku no preparasaun profisionál”, hateten.
Nia salienta tan, finalista sira-ne’e kompostu husi doutór, enfermeiru, nutrisionista, farmaséutiku no laboratorista sei fó kontribuisaun importante ba setor saúde no dezenvolvimentu nasional.
Finalista Célia Gomes Rasleo, hato’o agradese ba dosente timoroan no kubanu sira ne’ebé akompaña estudante sira durante prosesu aprendizajen.
“Fakuldade la’ós de’it fatin atu aprende koñesimentu akadémiku, maibé mos fatin ne’ebé forma responsabilidade, disiplina no valor sira atu prepara ami sai profisionál saúde ne’ebé kompetente no responsável. Maské hasoru dezafiu oioin, maibé ho esforsu, pasiénsia no determinasaun, ami konsege remata ami nia estudu ho susesu”, hateten Célia.
Finalista hamutuk 448 ne’e kompostu husi: Medisina Jeral (213), Enfermajen (136), Nutrisaun (26), Farmásia (56) no Siénsia Laboratóriu Médiku (21).
Partisipa husi, Pro-Reitór, Diretór Jeral, Diretór Nasional, Embaixadora Kuba iha Timor-Leste, Sra. Alina Aldama Innis (MSc), reprezentante no lider Brigada Médika Kuba, Dr. Andrés Villar Bahamonde, Dra. Diamela Henríquez Navarro, dosente, funsionariu, estudante no konvidadu sira.
