Universidade Nacional Timor Lorosa’e (UNTL) liuhusi Faculdade de Medicina e Ciência da Saúde (FMCS) nia Departamento de Medicina Geral (DMG) realiza Jornada Sientífika XVII ho tema “Ciéncias En las Aulas, Futuro Saludable” iha Auditóriu FECT Hera, Díli (16/10).

Diretora DMG dra. Diamela Henriques Navaro hatete, jornada sientífika ne’e atu fó opurtunidade ba estudante sira espresa sira-nia esperiensia, ideia, no promove kultura sientífika inovasaun.

“Atividade ohin ne’e estudante sira espresa sira-nia ideia no problema sira ne’ebé sira identifika ona iha ospital no komunidade sira atu bele hala’o estudu kazu liuhusi métodu kualitativu no kuantitativu hodi hetan solusaun ba problema saúde ne’ebé identifika ona.

Atividade ne’e mós atu aumenta koñesementu estudante sira-nian, ajuda entende kona-ba prinsipál problema saúde nian, no ajuda estudante sira atu sai profisionál investigadór saúde ne’ebé di’ak iha futuru no iha servisu”, Dehan dra. Diamela.

Estudante DMG Jonexio Fatima Soares hatete, materia ne’ebé sira hetan profunda tema ne’ebé relevante ba sira-nia estudu no ba iha sosiedade.

“Atividade ne’e realiza hodi fó opurtunidade mai ami atu espresa ideia kona-ba problema saúde ne’ebé mak sai preokupasaun iha ospital no iha komunidade sira atu ami bele halo investigasaun kazu kona-ba moras sira ne’e. Tema hirak ne’ebé iha livre ba estudante ida-idak mak identifika no ohin halo aprezentasaun atu profesór sira bele akompaña hodi halo diskusaun hamutuk hodi hetan solusaun”, Dehan Jonexio.

Eventu refere partisia husi estrutura DMG, Dosente Orientadór sira, no inklui estudante sira.