Universidade Nacional Timor Lorosa’e (UNTL) liuhusi Faculdade de Medicina e Ciência da Saúde (FMCS) nia kandidatu ba Associação Académica Estudantil, Arsénio Seixas Martins ho estrutura eleitu nu’udar kandidatu úniku ba períodu 2026-2028.

“Hanesan kandidatu úniku ba AAE-FMCS prontu atu lori estudante hotu nia interese hodi halo asaun ho responsabilidade atu estudante bele hala’o estudu ho livre iha ambiente universidade nian. Ami-nia programa prioridade ne’ebé halo iha mandatu dahuluk haree liu ba kontextu saúde, metodolojia peskiza no public speaking.

Programa sira-ne’e atu eleva estudante sira-nia koñesimentu iha vida lideransa, atu koalia no foti referensia sira tuir sistemátiku no promove mós semináriu nasionál sira hanesan konteúdu haree ba kondisaun sosiál iha Timor-Leste, liuliu importánsia sira ba saúde nian”, Dehan Arsenio iha Kampus Kaikoli, Díli (17/07).

Iha fatin hanesan Dekana FMCS Profesora Lidia Gomes hatete, eleisaun ne’e akontese ho kandidatu úniku la hatun lejitimidade prosesu demokrátiku ne’e, maibé sai opurtunidade ba estudante sira atu fó konfiansa no apoiu klaru ba lideransa foun senadu estudantil.

“FMCS fiar katak estudante sira la’os de’it simu koñesimentu no abilidade prátika, maibé sai mós parseiru estratéjiku iha dezenvolvimentu ba fakuldade. Aleinde ne’e atu reprezenta estudante sira-nia lian hodi promove unidade, hametin kultura akadémika, sientífiku no sosiál hodi sai ponte komunikasaun entre estudante sira ho estrutura fakuldade”, Dehan.

Dekana hatutan estrutura fakuldade sempre nakloke ba estudante sira atu fó sujestaun, krítika konstrutiva atu hadia fakuldade, tanba hakarak promove kultura diálogu la’os konflitu promove argumentu ho evidénsia, la’ós insultu no promove solusaun di’ak ba ema hotu.