Universidade Nacional Timor Lorosa’e (UNTL), Faculdade de Filosofia e Ciências Humanas (FFCH) nia Dekana Interina sesante, Me. Esmeralda Piedade de Araújo, ofisialmente entrega relatóriu ba estrutura foun ne'ebé lidera husi Dekanu Profesór Faustino Soares, iha Kampus Sentrál, Díli (04/08).

“Ha'u agradese ba profesór sira no funsionáriu sira hotu ne'ebé durante ne'e servisu hamutuk hodi lori FFCH to'o iha etapa ida-ne'e.

Ha'u hakarak dezeja ba estrutura foun atu hala'o knaar ho di'ak no responsabilidade. Maski ha'u remata ona mandatu ida-ne'e, ita sei kontinua servisu hamutuk hodi kontribui ba dezenvolvimentu fakuldade no universidade”, dehan.

Dekanu FFCH, Profesór Faustino Soares, hato'o agradesimentu klean ba Dekana Interina sesante ho nia ekipa, tanba esforsu no kontribuisaun sira durante mandatu ne'ebé lori progresu signifikativu ba fakuldade.

“Ha'u hato'o agradesimentu klean ba Dekana Interina sesante ho nia estrutura tanba durante mandatu sira konsege halo esforsu makas hodi hatudu progresu signifikativu ba fakuldade. Momentu ida-ne'e ami simu responsabilidade ne'ebé estrutura sesante husik hela mai ami.

Ho respeitu no determinasaun, ami sei kontinua serbisu ba oin, dezafiu no oportunidade oioin sei mosu iha futuru, maibé unidade no servisu hamutuk mak sai xave atu asegura progresu no dezenvolvimentu sustentável ba FFCH no Universidade”, hatete Dekanu.