Universidade Nacional Timor Lorosa'e (UNTL), liuhusi Faculdade de Economia e Gestão (FEG), realiza eleisaun ba estrutura Asosiasaun Akadémika Estudantil Fakuldade (AAEF), liuhusi eleisaun Fernando Ximenes ho nia estrutura hetan votu hamutuk 341 no manán iha eleisaun ne'ebé hala'o, iha Kampus FEG, Díli (17/07).

“Ami agradese tebes ba estudante sira hotu ne'ebé fó konfiansa ba ami. Konfiansa ida ne'e la'ós oportunidade ida, maibé responsabilidade boot ida ne'ebé ami tenke hala'o ho di'ak. Tanba ne'e, ami sei servisu hamutuk ho estudante sira, dosente sira no parte hotu atu fó kontribuisaun ba dezenvolvimentu FEG”, dehan Prezidente Ezekutivu Eleitu Ximenes.

Iha diskursu Vice-Decano para os Assuntos Estudantís FEG, Professór Aleixo Ximenes, agradese ba estudante sira ne'ebé partisipa iha eleisaun no fó konfiansa ba lideransa eleitu.

“Konfiansa ne'ebé estudante sira fó ba lideransa eleitu sai responsabilidade boot ida. Tanba ne'e, hau hein katak estrutura foun bele lidera ho transparénsia, responsabilidade no inkluzaun, no hatudu nia kompromisu liuhusi asaun, la'ós de'it iha liafuan”, dehan Vise-Dekanu III.

Reprezentante votante, Vaneza Bou Ramalho, husu ba prezidente eleitu ho nia estrutura atu servisu hamutuk ho responsabilidade, implementa programa sira no buka solusaun ba problema sira ne'ebé estudante sira hasoru iha FEG.

“Ha’u husu ba Prezidente AAE-FEG no nia estrutura sira atu servisu hamutuk no kolabora ho di'ak hodi hala'o sira-nia knaar ho responsabilidade. Ita boot sira tenke responde ba problema sira ne'ebé estudante sira hasoru no lori mudansa pozitivu ba FEG, tanba ita boot sira mak sei reprezentante, matan no tilun ba estudante sira”, dehan Vaneza.

Iha eleisaun ne'e, votante hamutuk 516 mak partisipa. Husi númeru ne'e, Pakote A hetan votu 341, enkuantu Pakote B hetan votu 155.