Universidade Nacional Timor Lorosa’e (UNTL) liuhusi Faculdade de Educação e Humanidades (FEH) realiza atividade Semana Arte no Kultura ho tema “Kultura no Tradisaun nu’udar Lalenok Identidade Timor-Leste nian” iha Kampus-Liceu, Díli (24/08).

Vise-Dekanu Asuntu Estudantís Profesór David Aleixo Guterres hatete, atividade ne’e realiza atu dezenvolve estudante sira-nia koñesimentu liuhusi orijen kultura Timor-Leste nian.

“Kultura hanesan identidade no haree ba moris ohin loron, joven barak ne’ebé la tau importansia ba kultura rasik nune’e ho atividade ne’e atu fó hanoin fali ba estudante sira oinsá atu dezenvolve sira nia-a’an hodi koñese di’ak liutan kultura orijen Timor nian. Aleinde ne’e mós tulun estudante sira la’os aprende de’it siensia maibé bele dezenvolve sira nian kreatividade, nune’e iha futuru la’os atu sai profesór de’it maibe bele iha talentu rasik”, Dehan Profesór David.

Iha fatin hanesan Prezidente Komisaun Organizadora Profesór Isac Araújo Mendonça hatete, atividade ne’e atu promove no dezenvolve kreatividade estudante sira-nian.

“Eventu ida-ne’e nu'udar planu FEH nian ne’ebé hala’o tinan-tinan atu promove no dezenvolve kreatividade liuhusi modalidade sira hanesan Koru, Dansa Kultura, Puizia, Diskursu, Fashion Show no Tein Ai-han Tradisional nune’e bele habelar talentu sira. Aleinde ne’e kria mós amizade entre estudante ho dosente”, Dehan Profesór Isac.

Atividade refere hala’o durante loron lima hahú husi 24-29 Agostu ho sesaun oioin, tanba servisu hamutuk entre estrutura fakuldade ho Senadu Estudantíl FEH nian.

Partisipa husi Diretór Departamentu husi Departamentu Sanulu (10) iha FEH, dosente, estudante no konvidadu sira.