Universidade Nacional Timor Lorosa’e (UNTL) liuhusi Faculdade de Ciências Sociais e Políticas (FCSP) realiza judisium ho tema "Hakat ba oin ho Siénsia, Kreatividade, no Integridade" hodi atribui títulu akadémika ba finalista na’in atus ida limanulu (150), iha Salaun Delta Nova, Díli (23/06).
Iha diskursu reprezentante Magnífiku Reitór atual Vise-Reitor ba Asuntu Akadémiku, Profesór Dr. Câncio Monteiro hatete, graduasaun la’ós de’it serimónia administrativu, maibé hanesan kolleta rezultadu husi tinan 4 ka 5 husi estudante sira-nia esforsu no estudu.
"Graduadu sira tenke uza koñesimentu no kompeténsia ne’ebé hetan ona hodi kontribui ba dezenvolvimentu Timor-Leste. Hadia governasaun, hamenus desigualdade, hametin instituisaun sira no promove relasaun nasional no internasionál. Graduadu sira presiza iha kapasidade inovasaun, pensamentu krítiku no kriatividade atu buka solusaun ba problema sira ne’ebé sosiedade enfrenta atualmente”, Dehan.
Iha fatin hanesan Dekanu FCSP Profesór Dr. Alarico da Costa Ximenes hatete, eventu refere la selebra de’it remata estudu ida, maibé mós hahú etapa foun ida iha moris graduadu sira-nian.
“Graduadu sira ne’ebé ohin simu sira-nia títulu sai ona reprezentante hosi FCSP no UNTL. Ho koñesimentu, valór no esperiénsia ne’ebé hetan ona, sira iha misaun atu kontribui ba konstrusaun sosiedade ida ne’ebé justu, demokrátiku, inkluzivu no sustentável. Sira tenke sai profisionál ne’ebé iha responsabilidade, integridade no vontade atu lori mudansa pozitivu ba komunidade no nasaun Timor-Lorosa’e”, Dehan Dekanu Ximenes.
Iha entrevista finalista Sonia de Jesus husi Departamento de Políticas Públicas hatete, orgullu, tanba bele remata estudu no hetan titulu liuhusi esforsu boot.
"Durante estudu iha universidade, ha'u hasoru dezafiu barak, liuliu pandemia COVID-19 ne’ebé halo aula muda ba online no halo prosesu aprendizajen sai difísil, tanba menus interasaun direta ho dosente sira. Aleinde ne’e, ha'u mós hasoru difikuldade atu adapta ho sistema foun, problema ekonomia no fatin hela. Maski nune’e, ho esforsu, pasiénsia no determinasaun, konsege ultrapasa dezafiu sira hodi remata ha'u nia estudu ho susesu”, Dehan.
Totál finalista husi Departamento de Administração Pública (16), Ciência Política (24), Desenvolvimento Comunitário (25), Políticas Públicas (18), Comunicação Social (30), Relações Internacionais (45) no Inclusão Comunitaria e Social.
Partisipa husi Diretór Ezekutivu FDCH Mestre Julio Aparício, estrutura FCSP, dosente, funsionáriu, família, estudante no konvidadu sira.
