Universidade Nacional Timor Lorosa'e (UNTL) liuhusi Faculdade de Ciências Sociais e Politicas (FCSP) nia Departamento de Comunicação Social realiza Espozisaun kona-ba “Aprezentasaun Kreatividade no Obra Estudante ano letivu 2026, iha Kampus FCSP Caicoli, Dili (22/10).
Diretora DCS Profesora Dra. Constancia S. C. B. de Jesus hatete, atividade ne'e anuál ne'ebé kada tinan sempre realiza hodi partilla ba públiku obra estudante sira-nian.
"Objetivu husi atividade ne'e atu valoriza no aprezenta obra kreatividade estudante sira-nian ba públiku liuhusi espozisaun hanesan prátika foto jornalismu, jornal parede, semináriu Internasional, talk show no sesaun podcast", dehan Diretora.
Iha fatin hanesan Pro-Reitór Para os Asuntos de Planeamento, Monitorização e Avaliação (PRAMA) Mestre Eng. Tomas Soares Xavier, M. Sc, hato'o parabéns ba fakuldade no DCS, tanba realiza atividade ne’ebé promove kreatividade estudante sira-nian.
"Ita fó apresia ba departamentu ne'ebé konvida profesór sira husi liur mai fahe sira-nia koñesimentu ba ita-nia estudante sira, orgullu boot ida ba ita, tanba departamentu bele konvida ema husi liur mai, nia intensaun di'ak ba ita-nia estudante sira.
Buat ida koñesimentu la'os ita iha parte UNTL de'it, maibé ita mós presiza ema seluk lori nia rezultadu peskiza mai fahe ba ita-nia estudante sira, apresia ba ema sira ne'ebé koopera mai fahe sira nia esperiensia ne'ebé iha”, dehan Pro-Reitór.
Ministro de Ensino Superior Ciência e Cultura Interino atuál Vise Primeiro-Ministro, Ministro para os Assuntos Sociais Eng Mariano Assanami Sabino, fó apresiasaun ba estudante sira ne'ebé organiza espozisaun ne'e.
"Liuhusi dalan ida-ne'e ita hatudu inovasaun kreatividade hodi halo kompetisaun entre joven no estudante sira, ne'e para hatudu imi-nia talentu di'ak, komunikasaun sosial ne'e fundamentu hametin ita-nia kuezaun sosial”, dehan Assanami.
Atividade ne'e realiza durante loron tolu hahú husi 22 to'o 24 Outubru 2026, ne'ebé organiza husi estudante turnu24, turnu25 no turnu26 akompaña husi dosente responsavel Profesór Alfredo Tael Fraga.
Partisipa husi reprezentante SECOMS, Visedekanu, dosente husi Universidade Malang, dosente DCS, estudante husi UCT, UNITAL, IOB, konvidadu no estudante DCS sira.
