Universidade Nacional Timor Lorosa’e (UNTL), liuhusi Faculdade de Agricultura (FAGRI), realiza eleisaun ba Asosiasaun Akadémika Estudante (AAE) ho pakote rua ne’ebé konkore ba períodu 2026–2028, iha Salaun Enkontru FAGRI, Hera, Díli (17/07).

Prezidente Komisaun Organizadora Eleisaun AAE FAGRI, Fladimar Oliveira Moruc, hatete katak iha eleisaun ne’e pakote rua mak partisipa, mak Pakote A “Makikit” no Pakote B “Three”.

“FAGRI iha pakote rua mak kandidata-an, mak Pakote A ‘Makikit’ no Pakote B ‘Three’. Maibé, ami senti triste uitoan, tanba laiha kandidatu feto ida ne’ebé konkore hodi reprezenta estudante sira iha fakuldade. Esperiénsia ida-ne’e bele sai lisaun ida ba futuru atu prepara no insentiva feto sira atu partisipa liután iha organizasaun estudantil”, hatete Fladimar.

Iha sorin seluk, estudante Dringgan Dircia Piedade da Costa, husu ba kandidatu ne’ebé sei eleitu atu kontinua sai matan-tilun ba estudante sira no promove atividade estrakurikular iha fakuldade.

“Ba kandidatu ne’ebé eleitu, ha’u espera katak sira bele sai liman no ain ba estudante sira, liuliu hodi hato’o preokupasaun ne’ebé estudante sira hasoru no kontinua promove atividade ekstrakurikular atu hasa’e kapasidade estudante sira ba futuru”, nia hatete.

Durante prosesu eleisaun, estudante sira hatudu entuziazmu aas hodi fó sira-nia votu ba Pakote “Makikit” no Pakote “Three”, ne’ebé sira konsidera bele lidera no reprezenta estudante sira iha FAGRI durante mandatu tinan rua, husi 2026 to’o 2028.