FAGRI nia estudante 259 sei hala’o ESS iha Bobonaro & Liquiça

Universidade Nacional Timor Lorosa’e (UNTL), liuhusi Faculdade de Agricultura (FAGRI), hala'o palestra hodi fahe matéria kona-ba Estájiu Servisu Sosial (ESS) ba estudante hamutuk 259 ne’ebé sei dezloka ba Munisípiu Bobonaro no Liquiçá.

Vise-Dekanu ba Asuntu Akadémika-FAGRI, Prof. Delfim da Costa, hatete katak FAGRI hala’o palestra preparatóriu ba estudante sira ne’ebé sei partisipa iha programa ESS 2026.

“Palestra ohin loron ne’e nu’udar preparasaun ba estudante sira ne’ebé sei partisipa iha ESS. Ita bolu oradór sira husi FAGRI atu fahe koñesimentu kona-ba área agrikultura, pekuária, agronomia, konservasaun rai no bee, inklui kriasaun animál. Nune’e, estajiáriu sira bele aplika koñesimentu hirak ne’e durante estájiu”, hatete Vise-Dekanu Costa iha Kampus FAGRI, Díli (23/09).

Profesór Delfim hatutan katak estudante sira sei aloka ba Munisípiu Bobonaro, liuliu iha Postu Administrativu Balibo, Suku Batugade, Postu-Atabae iha suku Hataz, Aidabaleten no Atabae. Enkuantu iha Munisípiu Liquiçá, Postu Administrativu Loes, Suku Vatuvoro, Guiço, no Postu-Administrativu Bazartete, Suku Fahilebo.

Oradór husi Departamento de Agronomia, Prof. Júlio Correia, hatete katak nia fahe matéria kona-ba métodu konservasaun rai no bee ba estudante sira.

“Ita ko’alia kona-ba konservasaun rai no bee. Bainhira ita implementa téknika kona-ba konservasaun rai no bee liuhusi métodu ne’ebé ha’u aprezenta ohin, presiza iha partisipasaun direta husi komunidade”, hatete Prof. Júlio.

Ana Maria Marques Freitas nu’udar finalista husi Departamento de Agro-Pecuária, sente kontente tanba to’o ona iha faze Estájiu Servisu Sosial.

“Ha’u sente kontente tebes tanba to’o ona iha faze Estájiu Servisu Sosial (ESS) ne’e. Liuhusi programa ne’e, ami sei bele aplika siénsia no koñesimentu ne’ebé ami aprende durante aula, ba komunidade sira. Iha tempu hanesan, ami mos aprende esperiénsia foun husi komunidade”, hatete Ana.

Estudante 259 ne’ebé sei partisipa iha Estájiu Servisu Sosial (ESS-FAGRI) 2026 kompostu husi Departamento de Agronomia (51), Agro-Sosio-Economia (54), Agro-Pecuária (47), Pescas e Ciências Marinhas (38) no Ciências do Solo (69).