Universidade Nacional Timor Lorosa’e (UNTL), nia Magnífiku Reitór Interina, atuál Vice-reitora para os Assuntos Estudantís (VRAE) Profesora Bia Ble Hitu de Carvalho hamutuk ho estrutura, dosente no estudante sira simu delegasaun husi JICA (Japan International Cooperation Agency) Headquarters Tokyo, lideradu Senior Vice Presidente JICA, Sr. Yuho Hayakawa ho ekipa iha FECT, Kampus Hera, Díli (16/09).

Reitór Interina hatete, universidade kontente tebes, tanba liuhusi vizita ne'e bele haree rezultadu husi kooperasaun JICA ho UNTL durante ne’e iha Faculdade de Engenharia Ciência e Tecnologia (FECT).

“UNTL ho JICA la’ós de’it parseiru dezenvolvimentu, maibé parseiru ne’ebé iha ona relasaun naruk no konfiável. Ami valoriza tebes relasaun ida-ne’e no hato’o agradesimentu sinséru ba JICA, Governu no Povu Japão, besik liu ho universidade no peritu sira ne’ebé servisu hamutuk ho UNTL durante tinan hirak liuba”, dehan nia.

Reitór Interina espera katak, parseria ne’e sei kontinua dezenvolve no kria oportunidade barak liután ba dosente, peskizadór no estudante sira.

Senior Vice President JICA, Sr. Yuho Hayakawa, hato’o apresiasaun ba FECT liuliu kona-ba dezenvolvimentu no rezultadu husi kooperasaun entre JICA no universidade.

“Kooperasaun ida-ne’e, FECT no JICA dezenvolve hamutuk no kontinua kontribui ba dezenvolvimentu Timor-Leste. Agradese ba UNTL no parte hotu ne’ebé kontinua apoiu no servisu hamutuk iha kooperasaun ida-ne’e”, hatete Nia.

Partisipa husi Estrutura FECT, Senior Director JICA ba Southeast Asia and Pacific Department, Sr. Junnosuke Iwano, Chief Representative JICA Timor-Leste, Sr. Daisuke Fukomori, no reprezentante senior no funsionáriu JICA Headquarters Tokyo, hamutuk ho reprezentante JICA Timor-Leste, dosente no estudante.