Universidade Nacional Timor Lorosa’e (UNTL) nia Magnífiku Reitór Profesór Dr. Joviano António Da Costa, M.Eng, ho Embaixada China iha Timor-Leste, Mrs. Wang Wenly distribui bolsa ba estudante hamutuk na’in 110, iha Auditoriu Faculdade de Ciências Sociais e Políticas, (FCSP) Caicoli, Díli (6/08).
Reitór apresia Embaixadora China Mrs. Weng Wenli, ba esforsu hodi apoiu bolsa ba estudante sira no husi bolsa ne’e haforsa ensinu, peskiza sientífika no kooperasaun instituisional iha UNTL.
“Apresiasaun boot ba Embaixadora Republika China iha Timor Leste, tanba sempre servisu makaas hodi haforsa ita nia estudante sira liuhusi finansia ba bolsa estudu nian.
Bolsa ne’e tulun tebes estudante sira liuliu haforsa mudansa akadémiku, peskiza sientífika no hametin koooperasaun instituisionál ho UNTL. Espera ita-nia kolaborasaun ne’e kontinua ba oin ho di’ak liutan”, dehan Reitór.
Embaixadora, Mrs. Wang Wenli hato’o parabens ba bolseiru sira, tanba simu ona bolsa ne’e hodi reforsa atividade akadémika nian.
“Parabens ba imi hotu ne’ebé simu ona bolsa ida ne’e, kooperasaun ho Timor Leste liuhusi UNTL hodi ajuda joven sira. Ami sempre prontu atu apoiu Timoroan sira iha ensinu superior nian, espera katak ita-nia kooperasaun bele kontinua hodi tulun estudante sira iha akedémiku nian”, dehan Embaxadora Weng Wenli.
Reprezentante bolseira Titi Gloria Herculano agradese no apresia ba apoiu husi Embaixada China, tanba benefisia tebes estudante sira.
“Agradese ba lideransa, servisu makaas no dedikasaun hodi suporta ami, no husi bolsa ne’e sai hanesan responsabilidade ba ita hotu hodi kontribui ba dezenvolvimentu ba ita-nia nasaun.
Ba bolseiru sira hotu, bolsa ne’e la’ós oportunidade, maibé tula hanesan responsabilidade hodi kontribui ba investimentu futuru nasaun nian”, dehan.
Bolsa ne’e kategoria ba tipu tolu mak hanesan, bolsa ba mellór klasifikasaun ba estudante na’in 52, bolsa hakbit ba estudante na’in 52 no estudante méritu na’in 6.
Akompaña husi Proreitór, Diretór Nacional, Dekanu, dosente, inan-aman, konvidadu no estudante sira.
