Universidade Nacional Timor Lorosa’e (UNTL) nia Vice-Reitor para os Assuntos Académica (VRAA) Profesór Câncio Monteiro, Ph.D, despedida dosente na'in-2 no estudante hamutuk na'in-8 ne’ebé sei ba tuir formasaun durante semana rua iha Universitas Pendidikan Mandalika (UNDIKMA), Indonézia.

VRAA, Profesór Monteiro, hateten katak estudante no dosente sira la’ós de’it ba Indonézia atu aprende téknika no regra, maibé mós tenki uza oportunidade ne’e atu hetan no dezenvolve esperiénsia foun.

“Aproveita oportunidade ida-ne’e ho di’ak. Aprende buat foun, buka esperiénsia no observa oinsá sira dezenvolve modalidade petanque iha Indonézia.

Bainhira imi fila mai, koñesimentu ne’ebé hetan la bele hela de’it iha imi, maibé tenki fahe no aplika ba estudante, atleta no komunidade desportiva iha Timor-Leste”, dehan VRAA Monteiro, iha Salaun Confederação do Desporto de Timor-Leste (CDTL), Díli (31/08).

Estudante na'in-8 no dosente na'in-2 ne’e husi Faculdade de Educação e Humanidades (FEH), Departamento de Ensino Físico e Desporto (DEFD).

Partisipa husi Pró-Reitor para os Assuntos da Cooperação (PRAC), Profesór Cristóvão dos Reis; Prezidente Confederação do Desporto de Timor-Leste (CDTL), Afranio Xavier Amaral, hamutuk ho nia Vise-Prezidente no Sekretáriu Ezekutivu; dosente, funsionáriu no estudante na'in-8.