Universidade Nacional Timor Lorosa'e (UNTL) liuhusi Diresaun Nasionál Atendimentu Estudante (DNAE), utiliza ona Sistema Informasaun Akadémika (SIA) ba prosesu re-inskrisaun semestre pár tinan letivu 2026.

Diretór DNAE Sr. Rui Loco Pires, iha nia knaar-fatin iha Kampus Sentral UNTL, Díli (09/07), hato'o apresiasaun ba PRAITDI ba esforsu no servisu ne'ebé halo hodi dezenvolve sistema SIA ne’e.

"DNAE agradese ba Gabineti PRAITDI, tanba Sistema SIA ne'e hakmaan tebes ami nia servisu. Uluk, atu hatene total estudante feto no mane tenke halo manual, ne'ebé presiza tempu barak. Agora, liuhusi sistema ida-ne'e, ami klik de'it no dadus ne'ebé presiza mosu kedas, nune'e servisu sai lalais no efisiente liután", hatete Rui Loco.

Nia aumenta tan katak, alende re-inskrisaun, departamentu sira seluk iha DNAE mós utiliza ona Sistema SIA ba prosesu rejistu graduasaun no simu estudante foun.

Iha sorin seluk, estudante Auxiliadora Gomes da Silva, husi Departamento de Língua Portuguesa, Faculdade de Educação e Humanidades, hato'o katak implementasaun sistema SIA fó benefísiu boot ba estudante sira, liuliu iha prosesu foti fixa planifikasaun.

"Sistema SIA ajuda tebes ami. Uluk, bainhira mai foti fixa planifikasaun, estudante barak dudu malu husi dader to'o loraik tanba prosesu seidauk dijitál. Agora, servisu sai lalais no atendimentu ba estudante mós di'ak liután", dehan Auxiliadora.

Sistema SIA ne'e dezenvolve husi ekipa tékniku Gabineti Proreitór ba Asuntu Informatizasaun, Transformasaun Dijital no Inovasaun (PRAITDI), ho objetivu atu hafasil no hasa'e efisiénsia servisu administrativu iha UNTL.

Implementasaun Sistema Informasaun Akademika (SIA) ne'e rezultadu husi kolaborasaun entre DNAE no PRAITDI atu transforma sistema administrasaun manuál ba sistema dijitál. Inisiativa ida-ne'e sai parte husi esforsu UNTL atu moderniza servisu administrativu, hasa'e efisiénsia no fó atendimentu ne'ebé lalais, transparante no efikás ba komunidade akadémika.