Universidade Nacional Timor Lorosa’e (UNTL) liuhusi Faculdade de Ciências Sociais e Políticas (FCSP), nia Departamento de Comunicação Social (DCS), hala’o atividade bina-akrab, servisu sosiál no sosializasaun, iha Kapela São Francisco Xavier, Suku Fatuquero, Postu-Administrativu Railaco Município Ermera.
Diretora DCS, Profesora Constancia de Jesus hateten, atividade ne’e halo parte iha pilar Universidade nian Ensinu, Peskiza no Servisu Komunitáriu, kada tinan iha estudante foun entaun oinsa mak bele enkaixa estudante sira ba ambiente DCS nian hodi kria lasu amizade entre estudante sira kada turnu ida-idak.
“Atividade ne’ebé ita halo iha ne’e mak servisu ne’ebé tulun komunidade sira konstrui kapela, sosializazaun ba komunidade sira kona-ba Perfil DCS no materia sira liga ba literasia dijitál, kalan kultura, fahe esperiénsia, asaun karidade, desportu no animasaun”, Dehan Diretora DCS.
Profesora Constancia hatutan, atividade ne’ebé estudante DCS hala’o ho objetivu atu kontribui ba komunidade sira. Tanba ne’e agradese ba servisu hamutuk tantu husi estudante, Komisaun Organizadora, Xefe Suku Fatuquero, Amu-Pároku, Katekista, dosente, alumni, komunidade no IGEADI, MSSI, no PNTL.
Iha fatin hanesan, Xefe Suku Fatuquero Sra. Leoncia Trindade sente orgullu tebes bele simu estudante DCS ho kuantidade boot no estudante sira hatudu duni amizade di’ak no sira bele adapta kedas ambiente iha suku nian.
“Ha’u hato’o agradese ba prezensa DCS nian, tanba bele mai apoiu mós asaun karidade ba populasaun sira no servisu fíziku ba Kapela São Francisco Xavier liuliu apoiu mós materiál ba kapela ne’e. Prezensa DCS iha ne’e hanorin mós ami atu halo asaun karidade no halo di’ak ba ema hotu. Ha’u mós husu atu atividade sira hanesan ne’e bele kontinua nafatin ba área rurál sira nune’e povu bele sente duni amizade ho universidade”, Dehan Xefe Suku.
Relasiona ho atividade ne’e, estudante turnu 2026 Eliciana Antonieta Perreira, dehan sente kontente tebes, tanba ho atividade ne’e bele hala’o interasaun no lasu-amizade di’ak ho komunidade no prepara estudante sira iha karatek komunikativu ne’ebé di’ak.
“Husi atividade ne’e hanorin ami atu servisu hamutuk no fó tulun ba ema seluk ne’ebé presiza liuhusi asaun karidade ne’ebé ita halo hatudu katak ema barak mak sei presiza ita-nia tulun”, Dehan Eliciana.
Atividade durante loron tolu (10 to’o 12 Jullu 2026) ne’e akompaña husi dosente DCS nian, (1) apoiu konstrusaun fíziku Chor Kapela São Francisco Xavier, (2) Hametin amizade entre estudante, dosente ho komunidade. (3) sosializasaun ba komunidade sira no estudante Suku Fatukeru kona-ba Vizaun no Misaun (Perfíl) DCS nian no literasia dijitál, desportu, animasaun kulturál, asaun karidade, misa-agradesimentu.
