Universidade Nacional Timor Lorosa’e (UNTL) liuhusi Direção Académica das Unidades Disciplinas Transversais (DAUDT) servisu hamutuk ho Instituto Nacional Linguística (INL) fasilita formasaun ba dosente transversais na’in- ne’en (6) kona-ba uniformizasaun sílabus ensinu Língua Tetun, iha Auditorium FEG, Díli (30/07).

Diretóra INL Profesora Rosa da Costa Tilman hatete, ekipa INL fasilita formasaun lian Tetun ba dosente transversais kona-ba métodu hanorin tuir padraun INL nian nune’e hafasil estudante bele komprende klean lian Tetun.

“Metodu ne’ebé ami fó iha formasaun ida-ne’e ho objetivu tulun dosente sira atu hanorin tuir padraun INL, ho metodu ne’ebé manorin sira gaña bele motiva estudante sira iha aula no interese atu aprende. Espera katak liuhusi formasaun ne’e dosente sira bele aplika no fasilita metodu sira ne’e iha prosesu ensinu aprendijazen nian”. Dehan Diretora.

Tuir Profesór Transversais Raimundo Silvino hatete, atividade workshop ida-ne’e nu’udar parte ne’ebé esensiál hodi hetan koñesimentu oinsá manorin sira elabora materiál didátika hodi forma sílabus nune’e bele aplika fali iha aula.

“Agradese ba ekipa organizadora ne’ebé realiza ona workshop ne’e hodi melloria ami-nia koñesimentu no abilidade atu bele prátika iha instituisaun ne’ebé serbí ba hodi fó kontribuisaun ne’ebé di’ak ba komunidade no país ida-ne’e, espera katak liuhusi koñesimentu ne’ebé ha’u hetan bele aplika fali iha prosesu ensinu nune’e estudante sira bele entende di’ak liutan lian tetun”, Dehan Raimundo.