Universidade Nacional Timor Lorosa'e (UNTL) nia Centro de Língua Portuguesa (CLP) realiza XI Jornadas Pedagógicas do Centro de Lingua Portuguesa ho tema " Língua Portuguesa Entre Tradição e Inovação: Ensinar, Aprender e Preservar”, iha Auditóriu FEG, Díli (23/10).
Diretora CLP Profesora Ana Jesuinha agradese ba ema hotu nia prezensa ne'ebé partisipa iha enkontru ne’ebé partilla koñesimentu, esperiénsia no ideia.
"Agradesementu ba instituisaun no parseiru sira ba realizasaun Jornadas Pedagójika hirak-ne’e bele akontese, tanba envolvimentu no kolaborasaun husi ema no instituisaun oioin.
Tanba ne’e, ha’u hakarak hato’o agradese ba UNTL, liuhusi Magnífiku Reitór, ba apoiu institusionál ne’ebé fó, la’ós de’it ba realizasaun jornada hirak-ne’e, maibé mós ba inisiativa sira seluk husi Centro de Língua Portuguesa", dehan Diretora Ana.
Diretora mós hato’o agradese ba Camões, I.P., Embaixada Portugál iha Timor-Leste, Fundação Oriente, Plural Editores no Timor Telecom, ba apoiu finanseiru no materiál ne’ebé sira fó, nune’e eventu refere bele realiza.
Reprezentante Magnífiku Reitór atuál Vise-Reitora Profesora Dra. Bia Ble Hitu Carvalho hatete, iha área edukasaun, profesór no estudante sira iha responsabilidade atu hanorin, aprende, preserva no promove Língua Portuguesa.
"Métodu hanorin tenke sai relevante, prátiku no ligadu ho realidade moris loroloron nian, atu estudante sira bele komprende no uza língua ne’e ho di’ak, língua mós iha relasaun besik ho literatura, istória, múzika no liberdade.
Liuhusi liafuan no arte, ema bele hatudu sentimentu, fahe hanoin no komprende realidade ne’ebé difisil atu esplika. Tanba ne’e, aprende língua la’ós de’it aprende gramátika, maibé mós aprende atu hanoin, komunika no komprende ema seluk", dehan.
Iha fatin hanesan Embaxador Portugal iha Timor-Leste Sr. Duarte Bue Alves hatete, língua mak espasu importante ida atu ema bele uza nia liberdade.
"Língua fó oportunidade ba ema atu hato’o sira-nia hanoin, krítika, no ideia livremente. Nune’e, língua sai instrumentu importante ida atu ezerse liberdade.
Ha’u fiar katak ita hotu iha esperiénsia ida-ne’e, dala ruma ita hanoin ka sente buat ruma, maibé bainhira ita hakarak esplika, ita la konsege hetan liafuan loos atu hato’o buat ne’ebé ita hanoin ka sente, situasaun ida-ne’e la’ós akontese de’it iha lian ida", dehan Embaxador Alves.
Partisipa husi Vice-Reitor para os Assuntos Académicos (VRAA) Prof. Dr. Câncio Monteiro, Dekanu, Visedekanu, Dosente, Diretora Sentru, Estudante no Konvidadu sira.
