Universidade Nacional Timor Lorosa’e (UNTL) nia Centro Estudo de Género Diversidade e Inclusão (CEGDI) ho Centro Estudo de Cultura e Arte (CECA) realiza semináriu ho tema “Husi Resisténsia ba Kontrusaun Nasaun: Legadu Durável Veteranu ba Paz Demokrasia no Lideransa Inkluziva” hodi komemora loron FALINTIL 20 Agostu (ba dala-51) no konsulta popular 30 Agostu (1999-2026).
Reprezenta Magnífiku Reitór atuál Vice-Reitor para os Asuntos Académicos (VRAA) Profesór Câncio Monteiro, Ph. D hatete, iha kontextu komemorasaun data históriku ne’e iha valór importante ba nasaun.
“Komemorasaun data istóriku ne’e iha valór ba nasaun hanesan loron FALINTIL no konsulta popular sai sentidu klean, bainhira universidade foti no integra ba iha siénsia, no semináriu ne’e sei foka iha tópiku legadu durável veteran Timor Leste nian no feto iha rezisténsia no harii paz.
Nasaun ne’ebé forte mak nia sidadaun sira la haluha istória no eroi sira-nia luta ba rai ida-ne’e. Ita aprende husi pasadu la’ós, tanba ita hakarak moris metin iha pasadu no istória, maibé tanba ita presiza baze ne’ebé metin hodi hamrik livre”, Dehan VRAA iha Auditóriu FCSP, Caicoli-Díli (26/08).
Iha fatin hanesan Diretora CEGDI Profesora Dulce Martins da Silva hatete, atividade ne’e rekorda eventu importante sira iha istória Timor-Leste nian.
“Ita hakarak promove prosesu reflesaun akadémika no krítika kona-ba istória, memória koletiva, kontribuisaun veteranu sira-nian, no oinsa legadu rezisténsia bele kontinua sai fonte aprendizajen ba konstrusaun estadu no sosiedade ne’ebé demokrátiku, dame, justu no inkluzivu”, Dehan Diretora CEGDI.
Partisipa husi Vice-Reitora Para os Asuntos Estudantís (VRAE) Professora Bia Ble Hitu Carvalho de Jesus, Dekanu FFCH Profesór Faustino Soares, Diretór, Dosente, Funsionáriu, Estudante no konvidadu sira.
