Universidade Nacional Timor Lorosa’e (UNTL), nia Magnifiku Reitór Interinu atual Vice-Reitor Para os Assuntos Académicos Professor Câncio Monteiro Ph.D, hamutuk ho Vice -Ministra Para os Assuntos da ASEAN S.E Milena Maria da Costa Rangel, ho parseria sira Abertura ba “34th Annual Human Rights and People’s Diplomacy Training Program”, iha auditoriu FCSP, Caicoli-Dili (23/08).

Reitór interinu hatete, UNTL mós sai membru Global Campus of Human Rights, hodi hametin edukasaun, peskiza no formasaun kona-ba direitus umanus.

“UNTL hato’o agradeseimentu ba Universidade New South Wales, Global Campus of Human Rights, Justice System Monitoring Programme no instituisaun parseira sira seluk ba sira-nia apoiu. Tinan ida-ne’e, simu partisipante na’in 30 husi nasaun 14, ne’ebé sei troka koñesimentu no esperiénsia kona-ba direitus umanus no diplomásia durante semana rua” dehan Interinu.

Diretór Ezekutivu Programa Formação Diplomátika, University New South Wales; Sr. Patrick Earle, agradese ba organizadór sira ne’ebé prepara simu ho kultura no tradisaun Timor-Leste.

“Hato’o agradesimentu ba UNTL, liuliu CDH, tanba sai anfitriaun ba edisaun dahaat ikus husi programa ne’e. Kolaborasaun ho UNTL importante tebes, tanba universidade mak fatin ne’ebé estudante no akadémiku sira dezenvolve koñesimentu no kapasidade”, dehan nia.

Diretór Ezekutivu ne'e espera, partisipante sira bele hetan inspirasaun husi istória no esperiénsia liuliu luta povu Timor-Leste ba autodeterminasaun no esforsu atu hametin direitus umanus, pás no diplomásia.

Vise-Ministra Asuntu ASEAN Timor-Leste S.E. Milena Rangel, hato’o parabéns ba UNTL no University of New South Wales, no parseiru hotu ne’ebé envolve iha organizasaun programa ne’e.

“Programa ne’e sai produtivu no signifikadu, ho diskusaun ne’ebé riku, ideia foun sira. Liuliu amizade iha rede relasaun sira ne’ebé bele kontinua nafatin maski imi hotu sei fila husi Timor-Leste. Hein katak imi sei aproveita tempu ne'e hodi troka esperiénsia, kultura no ospitalidade”, dehan Ministra.

Programa ne’e organiza husi Sentru Direitus Umanus, Global Campus of Human Rights ho parseria sira, husi loron 22 Agostu to’o 5 Setembru 2026, iha Timor-Leste.

Partisipa husi Vise-Reitór no Pro-Reitór, Diretór CDH Professór Armindo Maia, Reprezentante Global Campus of Human Rights Sr. Adriano Remiddi, Diretora Ezekutiva Judicial System Monitoring Programme (JSMP) Sra. Ana Paula Marçal, no instituisaun parseira sira, estudante no konvidadu Sira.