Universidade Nacional Timor Lorosa’e (UNTL) nia Administradór Jerál (AG) Mestre José Dionisio Ximenes hateten, lori naran universidade nian agradese ba reformadu (kompleta ona idade tinan 65) hamutuk na’in 33 ne’ebé kontribui ba dezenvolvimentu rekursu umanu.
“Lori universidade nia naran hakarak hato’o agradese wa’in ba iha ita-nia reformadu sira, tanba sira-nia kontribuisaun no dedikasaun hahú harii nasaun ida-ne’e, sira nia dedikasaun boot tebes hodi forma rekursu barak ne’ebé namkari iha Timor laran tomak.
Ita-nia funsionáriu sira-ne’e fó forsa hodi apoiu administrativamente liuhusi prosesu aprendisajen di’ak ho kualidade iha UNTL, ba ema hotu ne’ebé ohin loron haknaar aan iha fatin oioin”, Dehan AG hafoin distribui sertifikadu ba reformadu sira iha Auditoriu FCSP-Caicoli, Díli (29/09).
Komisáriu Komisaun Funsaun Públika ba Portefóliu, Pensaun no Reforma Sr. Jorge Paiva Araújo hatete, sertifikadu ne’ebé oferese hanesan sertifikadu apresiasaun no sertifikadu durasaun tempu ho nia lema “dezenvolvimentu Timor-Leste ne’e apos de independensia sura mós kontribuisaun sira-nian”.
“Ita boot sira-nia dedikasaun mak kontribui ba dezenvolvimentu Timor-Leste nia rekursu umanu ne’ebé ho kualidade, balu sai ministru, prezidente, tanba ne’e sei sura nafatin ita boot sira nia kontribuisaun bainhira universidade ka instituisaun sira seluk sei presiza ita boot sira”, Dehan Komisáriu.
Reprezentante funsionáriu reformadu Profesór Abrão dos Santos hatete, sertifikadu ne’ebé oferese hanesan onra ida ho emosaun klean ba kontribuisaun ne’ebé tinan barak dedika an ba instituisaun.
“Ita iha oportunidade atu haree UNTL dezenvolve no transforma-an no ita hotu kontribui ba edukasaun, formasaun juventude no dezenvolvimentu, ita remata ona etapa ida-ne’e ho orgullu, dignidade no sentimentu katak, ita kumpri ona dever.
Ohin ita simu sertifikadu apresiasaun ne’e la signifika ita-nia ligasaun ho universidade remata ona, maibé ita sei sai nafatin parte husi universidade hodi nafatin kontribui ho maneira diferente ba sosiedade no ba dezenvolvimentu Timor-Leste nian”, dehan Profesór Abrão.
Funsionáriu reformadu ne’e hamutuk (33) ne’ebé reforma ona iha tinan 2026 kompostu husi rejime jerál (11) no rejime espesiál (22).
Atividade ne’e organiza husi Direção Nacional dos Recurcos Humanos (DNRH). Partisipa husi Vise-Reitora, Pro-Reitor, Dekanu, Vise-Dekanu, Diretór, funsionáriu no konvidadu sira.
