Universidade Nacional Timor Lorosa'e (UNTL) Liuhusi Faculdade de Ciências Sociais e Políticas nia Profesór Dr. Amândio de Araújo Sarmento, aprezenta Oratio Sapientia ho títulu “Diploma La'os De'it Prova, Maibé Responsabilidade ba Nasaun” liuhusi serimónia solene Graduasaun ba dala XXXIV, iha Centro Convenções de Díli (29/06).

Iha nia oratio, Profesór Amândio hato'o parabéns ba graduadu sira tanba sira hatudu perseveransa, disiplina no esforsu boot durante sira-nia viajen akadémika to'o konsege remata estudu iha UNTL.

“Diploma ne'ebé imi simu ohin loron la'os de'it prova katak imi remata ona estudu. Diploma ne'e reprezenta responsabilidade atu uza koñesimentu hodi servisu ba komunidade no kontribui ba dezenvolvimentu nasaun”, dehan Profesór.

Reprezentante graduada, Cristina de Jesus dos Santos, husi Faculdade de Filosofia e Ciências Humanas (FFCH) hatete, graduasaun remata etapa ida iha universidade, maibé marka hahú responsabilidade foun.

“Graduasaun la'ós de'it kona-ba simu diploma, ida ne'e lori responsabilidade no kompromisu atu aplika koñesimentu, siénsia no teoria ne'ebé ami aprende ona hodi fó benefísiu ba sosiedade, liuliu ba família no komunidade”, dehan Cristina.

Cristina akresenta tan, sei kontinua aplika koñesimentu ne'ebé hetan ho responsabilidade no integridade, tanba étika mak sai valór ida ne'ebé aas liu.