Universidade Nacional Timor Lorosa'e (UNTL), Faculdade de Engenharia Ciência e Tecnologia (FECT) nia Profesór Doutór Valério de Sousa Sousa Gama hato'o Oratio Sapiénsia kona-ba "Susesu Mai Husi Luta Kontinua Mellora no Responsabilidade", iha ámbitu graduasaun ba dala XXXIV iha Centro Convenções de Díli (25/06).
Liuhusi diskursu Oradór hatete, graduadu sira tenki esforsu, tanba susesu mai husi luta hodi kontinua mellora no responsabilidade atu servi komunidade no nasaun.
"Iha serimónia graduasaun liu-liu ba graduadu nivel lisensiatura, pós-graduasaun no mestradu sira atu kuda valór di'ak no atinji objetivu sira ho responsabilidade ba imi-nia moris profesionál. Aleinde ne'e universidade nia misaun atu forma profisionál no inteletuál sira ne’ebé kontribui ba dezenvolvimentu.
Graduadu sira tenke utiliza koñesimentu no abilidade ne’ebé hetan ona atu nune'e bele servi ba nasaun", dehan Profesór Doutor Valério.
Entretantu Graduada Marta Pereira Rego husi Faculdade de Agricultura, Departamento de Pescas e Ciência Marinha hatete, atu hetan susesu presija esforsu no servisu hamutuk nune'e bele atinji objetivu di'ak liutan iha futuru.
"Prosesu estudu iha UNTL ne'e la'os fasil, maibé presiza luta no esforsu nafatin to'o susesu. Bainhira finaliza ona ita tenki aplika ita-nia étika no moral liuhusi parte sira-ne'e oinsa aplika siénsia ne'ebé ita aprende bele hatudu dedikasaun no valór universitáriu nian ba komunidade", dehan Graduada Pereira.
