Universidade Nacional Timor Lorosa'e (UNTL), liuhusi Faculdade de Medicina e Ciência da Saúde (FMCS), Departamento de Medicina Geral, nia estudante hamutuk na'in (26) hala’o aprezenta rezultadu estudu kona-ba situasaun Saúde iha Suku Madohi, Postu-Administrativu Dom Aleixo, Munisípiu Dili.
Koordenadór Peskiza, Mateus António Geraldo Moniz da Silva hatete, peskiza ne'e ho métodu observasaun deskritivu, analítiku, transversal no konsege identifika problema ne'ebé komunidade sira enfrenta.
"Ami konsege deteta problema vektor risku ba moras ne'ebé hadaet no la hadaet ne'ebé komunidade sira hasoru iha aldeia tolu hanesan, susuk, lalar, barata no laho, risku kontaminasaun liuhusi ahi suar, moras ISPA, infeksaun respiratoriu Aguda, Hipertensaun arterial, ran midar.
Ami halo planu asaun ba prevensaun kona-ba medida kontrola vektor, no distribuisaun role card ba komunidade sira kona-ba prevensaun ISPA", Dehan Kordenador Mateus Moniz da Silva iha Sede Suku Madohi, Díli (08/06).
Estudante ne'e mós husu ba komunidade atu muda estilu vida hodi prevene komplikasaun grave hanesan stroke ka moras fuan (serangan jantung). Sira ne'ebé moras tensaun no ran midar no husu atu nafatin halo kontrolu regulár iha Sentru Saúde ka Postu Saúde báziku sira.
Iha fatin hanesan, reprezentante Xefe Suku Madohi atual Xefe Aldeia Beto Leste, Adriano Moniz, hato’o apresiasaun ba servisu no dedikasaun husi estudante sira, ne'ebé durante ne'e halo peskiza iha Suku Madohi.
"Nu'udar líder komunitáriu, ami senti orgullu bo’ot ba prezensa estudante sira-nian, liuhusi rezultadu peskiza ne'e, sai nu'udar matadalan ida mai ami autoridade lokál hodi haree loloos problema ne'ebé ami-nia komunidade sira enfrenta iha bairu laran", dehan Xefe Aldeia.
Xefe Aldeia ne'e mós rekomenda ba profesór sira husi UNTL atu kontinua apoia no haruka estudante sira kontinua obra di'ak ba iha fatin seluk.
Peskiza ne'e, hala'o durante fulan rua hahú husi fulan Abril to'o Juñu, área tarjetu iha aldeia tolu mak hanesan, Aldeia Rozáriu, 07 de Detembru no Beto Leste. Partisipante hamutuk 3.098 kompostu husi uma-kain 604.
Iha atividade ne'e mós halo konsulta jerál ba komunidade sira. Partisipa husi Embaixadora Cuba iha Timor-Leste, Msc. Alina Aldima Innis, Diretora Kursu Medisina Jerál, Dr. Dianela Henrique Navaro, Dosente Cubano, autoridade lokál, komunidade sira, konvidadu no estudante sira.
