Universidade Nacional Timor Lorosa'e (UNTL) nia estudante Mevin Teresa Miranda husi Faculdade de Direito hateten, liuhusi sesaun palestra ne’ebé nia partisipa, bele komprende kona-ba atividade halo leitura loro-loron hodi lee, komprende no interpreta.

"Durante iha palestra ne'e, buat ne'ebé ha’u hetan husi oradór mak kona-ba oinsá leitór ida iha vontade atu lee no komprende hodi halo interpretasaun bazeia ba livru ne'ebé ita lee. Tanba leitura hanesan pontu fundamental ida oinsá atu loke ema ida nia hanoin hodi deskobre mundu koñesimentu nian", Dehan Mevin hafoin partisipa iha sesaun palestra ne’ebé realiza husi Diresaun Nasionál Jestaun Biblioteka (DNGB), iha Kampus Sentral, Díli (01/07).

Iha fatin hanesan Oradór ba palestra ne'e Profesór Dr. Vicenti Paulino iha nia aprezentasaun hatete, livru hanesan janela ida ba ema hotu oinsá atu koñese mundu.

"Ko'alia kona-ba leitura ita la sees husi sentidu livru ne'e rasik, livru hanesan janela ida ba ita atu koñese mundu iha nia totalidade. Ema barak mak dehan la presiza livru ona, tanba hetan ona informasaun husi internet, maibé ne'e la'os refere ba koñesimentu, tanba ne'e mak livru nu'udar elementu esensial ba iha prosesu aprendisajen", Dehan Oradór.

Atividade palestra ne'e organiza husi Diresaun Nasional Jestaun Biblioteka hodi komemora loron mundial biblioteka nian.