Universidade Nacional Timor Lorosa’e (UNTL) liuhusi Graduasaun Solene ba XXXIV iha Centro Convenções de Díli (25/06), Reprezentante inan-aman Marito da Costa sente kontenti, tanba ho esforsu oan bele gradua ona husi universidade.

"Susesu ida-ne’e sente orgullu tebes ba família tomak, tanba oan susesu, bele halo ami kontenti maske ekonomia la sufisenti atu selu eskola, selu kos. Maibé ami esforsu nafatin to'o oan bele susesu”, Dehan Marito.

Iha fatin hanesan Graduadu ho grau Mestre em Educação, Especialidade de Línguas e Literatura António Referino Ximenes hatete, la fasil atu tama iha UNTL no la fasil liután atu remata.

“Ita bele hatete katak sai graduadu iha UNTL, la’ós hanesan mehi ida, iha kalan ne’ebé realiza kedas iha dadeer tuirmai. Maibé hanesan prosesu naruk no susar ida. Tanba ne’e, ita tenke sai graduadu sira ne’ebé kualifikadu, responsável no étiku iha era transformasaun dijitál ida-ne’e”, Dehan Antonio.

Seremónia Solene ne'e partisipa husi estrutura UNTL no fakuldade nian, dosente, inan-aman, no konvidadu sira.