Universidade Nacional Timor Lorosa’e (UNTL) realiza serimónia solene liuhusi graduasaun ba dala XXXIV ho tema “Graduados Qualificados, Responsáveis e Éticos na Era da Transformação Digital” durante loron rua (25 no 29 fulan Juñu ho graduadu 1461 (rihun ida atus haat neen-nulu resin ida), iha Centro Convenções de Díli (25/06).
Magnífiku Reitór UNTL Profesór Dr. Joviano António da Costa, M.Eng. konvida graduadu sira atu reflete dezafiu iha tempu ohin loron, tanba dadaun ne’e iha ona époka dijitalizasaun husi sistema artifisial intelijénsia ne’ebé lais liu no avansu koñesimentu sientífiku nian.
“Parabens ba parte hotu ne’ebé hola parte iha esforsu ba ita-nia graduadu sira to’o ohin loron finaliza ona. Husi serimónia solene ida ne’e ita selebra nu’udar momentu importante ba hodi kontribui ba nasaun iha espasu rejional, dinámiku, kompetitivu iha koñesimentu sientífiku”, dehan Reitór, iha abertura ba gradusaun sesaun dader nian.
Iha diskursu Ministro Ensino Superior, Ciência e Cultura (MESCC) Interino atual Vise-Primeiro-Ministro, Ministro Coordenador dos Asuntos Sociais, Ministro do Desenvolvimento Rural e Habitação Comunitaria, S.E Mariano Asanami Sabino hatete, diploma ne’ebé distribui ba graduadu sira simbólika nu’udar dezenvolvimentu rekursu umanu ba konstrusaun Timor Leste nian.
“Diploma nu’udar símbolu ida hodi konstrui nasaun ida ne’ebé kompetitivu no preparadu liután. Tanba ne’e ha’u hakarak hato’o ha’u-nia saudasaun Akadémiku ba Komunidade Akadémiku hotu, tanba imi hatudu ona komprimísiu la’ós de’it atu partilla koñesimentu maibé atu desenvolve siensia no promove inovasaun no kontribui ba sustentabilidade ita-nia nasaun”, dehan MESCC Interino S.E Asanami.
Graduasaun sesaun dader loron dahuluk nian muda fita no distribui diploma ba Faculdade de Engenharia Ciência e Tecnologia (150), Faculdade de Agricultura (71), Faculdade de Ciências Exatas e Naturais (7). Enkuantu Programa de Pós-Graduação e Mestrado ho graduadu (51).
Partisipa husi membru governu, korpu diplomátiku sira, estrutura UNTL no fakuldade nian, dosente, inan-aman, parseiru dezenvolvimentu no konvidadu sira.
