Universidade Nacional Timor Lorosa’e (UNTL) liuhusi graduasaun ba XXXIV, reprezentante Ministro do Ensino Superior Ciência e Cultura (MESCC) no atuál Diretór Geral Ensino Superior e Ciência, Sr. Domingos Barros hatete, profesór di’ak mak ema ne’ebé aprende loro-loron, tanba ne’e diploma ne’ebé graduadu sira hetan, husi esforsu no apoiu parte hotu.

“MESCC hakarak hato’o parabéns ba parte hotu, tanba ho apoiu tomak mak graduadu sira ohin simu diploma. Ba graduadu sira, Timor-Leste nia futuru sei harii husi eskola sira, tanba ne’e imi-nia misaun importante tebes, ho konfiansa no kompromísiu, ha’u dezeja susesu boot ba imi hotu”, dehan Sr. Domingos iha graduasaun solene ba loron daruak iha parte loraik, iha Centro Convenções de Díli (29/06).

Iha diskursu Magnífiku Reitór Profesór Dr. Joviano António Da Costa, M.Eng hatete, foinsae sira iha responsabilidade hodi transforma liberdade ida-ne’e ba dezenvolvimentu, prosperidade no oportunidade ba ema hotu.

“Joven pasadu sira luta ona ba liberdade nasaun ida ne’e, joven sira agora liuliu graduadu hotu foti responsabilidade ba dezenvolvimentu, tanba ensinu superior asume estratéjia importante ba futuru Timor-Leste nian iha setór edukasaun no setór importante sira seluk”, dehan Reitór.

Iha graduasaun ba dala XXXIV ho tema “Graduados Qualificados, Responsáveis e Éticos na Era da Transformação Digital” durante loron daruak, parte lokraik ho graduadu hamutuk hamutuk 370 (atus tolu hitunulu) husi Faculdade de Educação e Humanidades (FEH).

Partisipa husi membru governu, korpu diplomátiku sira, estrutura UNTL no fakuldade nian, dosente, inan-aman, parseiru dezenvolvimentu no konvidadu sira.