Universidade Nacional Timor Lorosa'e (UNTL) liuhusi Direção Nacional Gestão Biblioteca (DNGB) realiza programa semana do livro iha ámbitu Dia Mundial das Biblioteca iha sala Biblioteca Sentral UNTL.

Diretór DNGB Sr. José Francisco Mendes hateten, eventu ne’e importante atu halo reflesaun kona-ba papél estratéjiku biblioteka iha dezenvolvimentu edukasaun no investigasaun sientífika.

"Programa Semana do Livro ne'e, atu promove kultura leitura no hasa'e interese estudante sira ba livru no fonte informasaun sira nomos fortalese relasaun entre biblioteka ho komunidade akadémika no sosiedade em jeral.
Semana ida-ne'e ita sei halo atividade sira hanesan espozisaun livru, palestra nomós formasaun ba bibliotekáriu sira", Dehan Diretór Mendes iha Kampus Sentral, Díli (30/06).

Iha fatin hanesan Administrador Geral (AG) Profesór José Dionisio Ximenes hateten, Dia Mundiál da Biblioteca importante tebes, tanba la'ós deit ba Timor-Leste, maibé sai komemorasaun mundu tomak.

"Biblioteka iha importánsia estratéjika ba universidade, sei la iha biblioteka universidade ida sei lakon parte husi nia identidade akadémika. Tanba ne'e, profesór, estudante no komunidade universitária tomak tenke hamutuk hodi promove kultura leitura no investigasaun sientífika.
Husu mós ba estudante sira mai universidade la'os deit atu tuir aula, maibé atu aprende, lee livru, buka informasaun no aumenta koñesimentu husi rekursu sira ne'ebé biblioteka fornese. Biblioteka ne'e sai fatin importante ba formasaun inteletual no dezenvolvimentu ema nian", Dehan AG.

Atividade ne'e partisipa husi Pró-Reitor para os Assuntos de Receitas (PRAR) Profesór Mario Marques Cabral, Diretor sira, Xefe Departamentu, dosente, funsionáriu, estudante no konvidadu sira.