Universidade Nacional Timor Lorosa’e (UNTL) Faculdade de Filosofia e Ciências Humanas (FFCH), liuhusi Departamento de Filosofia (DF), nia graduadu Camilo Pinto hatete, durante estudu hasoru dezafiu ekonómika, maibé lá sai bareira.

“Dezafiu boot ne’ebé ha’u hasoru mak ekonómika, tanba ha’u mai husi família simples. Maibé nafatin esforsu atu nune'e bele atinji ha'u-nia mehi. Alende ne'e problema hirak ne’e lá sai hanesan impedimentu ba ha’u-nia futuru. Ha’u kontinua esforsu no ultrapasa dezafiu hotu, no konsege remata estudu no sai hanesan mellor graduadu”, hatete Graduadu Mellor Camilo iha serimónia solene ba XXXIV graduasaun iha Centro Convenções de Díli (29/06).

Iha fatin hanesan, reprezentante inan-aman, Sónia Halek Fátima, hatete sente orgullu, tanba nia alin konsege remata prosesu akadémiku maski família hasoru difikuldade ekonómika.

“Nu’udar biin, ha’u sente orgullu no agradese, tanba prosesu ne’e la fasil. Maski ami-nia moris hanesan ema ai-leba nafatin kontinua esforsu atu suporta alin sira-nia edukasaun. Tanba edukasaun mak sai prioridade bo'ot iha ami-nia família”, hatete Sónia.