Universidade Nacional Timor Lorosa’e (UNTL) liuhusi Faculdade de Agricultura nia Departamento de Saúde Animal (DSA) servisu hamutuk ho APCOVE (Asia-Pacific Consortium of Veterinary Epidemiology) realiza Programa Epidemiolojia hodi hametin saúde animal iha Timor-Leste (TL) no aumenta kapasidade profisionál no peskizadór sira-nian.

Iha entrevista Diretór DSA Profesór Abrão José Pereira hatete, programa ne’e implementa atu apoiu mentór sira, hodi akompaña ekipa peskiza sira iha dezenvolvimentu projetu durante períodu formasaun.

“Workshop ne'e organiza husi APCOVE husi Epidemiologista sira iha área veterinária iha rejiaun Asia no Pasífiku nian inklui Australia, Timor-Leste, Nova Zelándia no nasaun seluk ne’ebé envolve iha projetu ne'e.

Parseiru prinsipal ba APCOVE nian iha Timor-Leste mak ita nia universidade liuhusi FAGRI-DSA. Programa ne’e importante tebes, tanba ajuda profisionál sira atu aumenta kapasidade peskiza no aplika abordajen One Health iha kontekstu Timor-Leste, ne’ebé liga ho saúde umana, saúde animal no saúde ambientál”, dehan Diretór, iha Kampus FAGRI Hera, Díli (09/06).

Iha fatin Profesór Joerg Henning husi Eskola Siénsia Veterinária Queensland University of Australia hatete, liuhusi programa ne’e atu hametin kapasidade profisionál lokál sira-nian iha área vijilánsia moras no investigasaun surtu animál nian iha TL.

"Projetu APCOVE liuhusi kooperasaun ne'e, ita bele lori rezultadu di'ak ba dezenvolvimentu saúde animál iha TL. Ami laran-haksolok tebes atu servisu hamutuk ho parseiru sira hotu iha ne'e, hodi garante kualidade no sustentabilidade ba peskiza projetu no monitór direta husi mentór lokal Timor-Leste hamutuk ho mentór internasionál husi Australia", dehan Profesór Joerg Henning.

Partisipa husi Dekanu Interinu FAGRI, Profesór Graciano Gomes, ekipa husi AIFAESA IP, MAPPF, Menzeis, DSA UNTL nomós husi Queensland University, Charles Sturt University, ho University of Adelaide.