- Detalhes
- Visualizações: 468
#TimorLeste #UNTL #PRAPA #COVID19 #COVID19TL 13 Abril 2022
Universidade Nacional Timor Lorosa’e (UNTL) nia Magnífku Reitór, Profesór dr. João Soares Martins, MPH, Ph.D, akompaña husi estrutura hala’o asaun karitativa kuarezmal tinan ida ne'e iha orfanato Ismaik Postu-Administrativu Maubara, Munisípiu Liquiça, (13/04).
Iha lokál atividade nian, Magnífiku Reitór hataten atividade refere organiza husi Gabinte Proreitoria ba Asuntu Provedoria no Akonsellamentu (PRAPA), kada tinan sempre halo iha momentu Páskua, atu hakbesik an ba komunidade hodi tulun sira ba buat ne’ebé sira presiza.
“Agradese tebes bele mai hamutuk ho oan sira iha ne’e, tanba iha momentu kuarezma ne’e, tempu atu fahe haksolok ba malu liuliu ho orfanatu oan sira ne’e, tuir kbiit universidade nian liuhusi asaun karitativa”, tenik Reitór. 
Asaun karitativa ne’e partisipa husi Visereitór, Proreitór, Diretór-Jerál, Madre Esmeralda Piedade de Araújo, Ekipa Gabinete PRAPA no Reitoria, Amu Kapelaun UNTL nian, Pr. Nivio Lebre Correia, Fdcc, no orfanato oan sira.
Média UNTL 📝 : Agostinho da Cruz e Silva
Foto 📷 : Pio Belo Ximenes
- Detalhes
- Visualizações: 403
#TimorLeste #UNTL #MESSK #FDCH #COVID19 #COVID19TL 12 Abril 2022
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D, hamutuk ho Ministru Ensinu Superiór, Siénsia no Kultura (MESSK), S.E. Longuinhos dos Santos, inaugura edifísiu foun ba funsionamentu Administrasaun Jerál Universidade nian, iha Kampus Sentrál UNTL nian, Dili, (12/04).
“Agradese ba Reitór sesante, Profesór Doutór Francisco Miguel Martins, ho nia estrutura, no MESSK, ne’ebé iha VIII Governu ho esforsu konsege harii edifísiu ne’e, tanba ho kolaborasaun hirak ne’e bele kria kondisaun ba funsionamentu Administrasaun Jerál nian”, dehan Magnífiku Reitór iha nia diskursu.
Profesór João mós husu ba estrutura Administradór Jerál nian ho funsionáriu sira atu uza edifisiu foun tenke dezempeñu servisu ho di’ak no profisionál liután iha UNTL no uza hanesan na’in no responsabilidade.
Ministru Ensinu Superiór, Siénsia no Kultura, S.E. Longuinhos dos Santos, hateten, infraestrutura importante atu hadia kualidade ensinu, tanba ne’e maka VIII Governu liuhusi MESSK esforsu makaas hodi tulun kondisaun no dezenvolve UNTL sai hanesan projetu kualidade sientífiku no pedagójiku nian.
“Ohin ita inaugura edifísiu foun ne’e, liuliu ba administrasaun nian tanba liuhusi administrasaun mak fó impaktu pozitiva ba efisiénsia no efikásia servisu funsionáriu sira, tanba ne’e maka VIII Governu liuhusi MESSK esforsu makaas hodi tulun kondisaun no dezenvolve UNTL sai hanesan projetu kualidade liuliu sientífiku no pedagójiku nian ba Timor-Leste”, tenik.
Partisipasaun husi Reitór sesante, Profesór Doutór Francisco Miguel Martins, no nia estrutura, estrutura atuál Visereitór, Proreitór, Diretór-Jerál, Diretór Nasionál, Dekanu, Visedekanu, Funsionáriu, Estudante sira, Embaixadóra Portugal iha Timor-Leste, Dra. Manuela Bairos, Diretór Ezekutivu Fundu Dezenvolvimentu Kapitál Umanu (FDCH), Profesór Doutór Cristóvão dos Reis, Prezidente Komisaun Funsaun Públika (CFP), Profesór Doutór Faustino Cardoso Gomes, no konvidadu sira.
Média UNTL 📝 : Leonia de Araújo da Costa
Foto 📷 : Denilson Amandio Barros&Laurindo da C Gomes
- Detalhes
- Visualizações: 577
#TimorLeste #UNTL #PRAPA #COVID19 #COVID19TL 11 Abril 2022
Universidade Nacional Timor Lorosa'e(UNTL) na Proreitoria ba Asuntu Provedoria no Akonselhamentu (PRAPA), realiza misa agradesimentu ba orientasaun akadémika ba estudante foun tinan 2022 nian, iha Igreja Imaculada da Conceição, Catedral Dili, (11/04).
Iha misa agradesimentu ne'e, Magnífiku Reitor UNTL, Profesor dr. João Soares Martins, MPH, PhD, agradese ba Sívitas Akadémika hotu, tanba bele hahú misa abertura anu akadémiku no misa agradesimentu ba orientasaun tinan 2022 nian.
“Ita hahú selebrasaun misa agradesimentu ba orintasaun nian, nomós abertura anu akadémiku 2022 nian, atu Nai Maromak tulun no haraik bensaun nafatin mai ita no akompaña ita iha vida tomak liuliu ba estudante foun sira foin tama mai UNTL”, tenik Magnífiku Reitor.
Reitor mós dezeja katak, estudante sira aprende no estudo didiak, nomós tenki respeitu Inan-Aman, professor sira, no hatudu responsabilidade no dever atu hatudu respeitu regulamentu sira liuliu iha areadór UNTL nomós iha fatin seluk.
Amu Kapelaun UNTL nian, Pe. Nivio Lebre Correia, Fdcc, iha nia homilia hatete, ohin ita realiza misa agradesimentu hamutuk no husu Nai Maromak nia tulun ba estudante foun sira.
“Ita hotu hola parte iha misa ne'e, atu Nai Maromak haraik nafatin grasa uain ba ita-nia Universidade liuliu ba estudante foun sira ne'ebé hakarak hala'o kursu akadémiku iha tinan 2022 nian no husu roman Espíritu Santu nian atu akompaña imi ida-idak”, tenik.
Partisipa husi Visereitór, Proreitór, Diretór-Jérál, Diretór Nasionál, Xefe Departamentu Funsionáriu sira, Dosente no Funsionáriu estudante tuan no Estudante foun sira.
Média UNTL 📝 : Denilson Amândio Barros
Foto 📷 : Pio Belo Ximenes, Julito Afonso
- Detalhes
- Visualizações: 470
#TimorLeste #UNTL #PRAPA #COVID19 #COVID19TL 12 Abril 2022
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D, hamutuk ho Sívitas Akadémika universidade nian, hala’o viasakra hodi hametin fiar ba estudante, dosente, no funsionáriu sira idaidak hodi halo reflesaun ba semana Santa Igreja Katólika nian. 
Relasiona ho dalan Krus ne’e (8/4), Magnífiku Reitór UNTL nian, hateten, Sívitas Akadémika universidade nian hanesan mós Sarani Katólika, halibur hamutuk liuhusi viasakra importante hodi reflete Jesus Kristu Nia viajen ba Foho Kalváriu.
“Ohin loron ita hamutuk banati tuir Jesus Kristu Nia viajen ba Foho Kalváriu, foho ne’ebé as tebes, tanba ne’e mezmu ita la’o de’it iha sidade laran, maibé hatudu fiar sarani nian, tanba ne’e husu atu ita hotu partisipa ho responsabilidade, nune’e hametin ita-nia fiar tuir Jesus”, hatutan.
Amu Kapelaun UNTL nian, Pe. Nívio Lebre Correia, Fdcc agradese ba partisipasaun Sívitas Akadémika nian, tanba viasakra ne'e importante tebes hodi ema hotu reflete Jesus nia sakrifísiu no domin ema sira.
“Lori Proreitoria ba Asuntu Provedoria no Akonsellamentu (PRAPA) nia naran, agradese ba Sívitas Akadémika, hotu nia partisipasaun importante atu ita ema reflete hikas Jesus nia sakrifísiu no fo nia domin ba ita to’o mate iha Krus”, tenik Pe. Nivio.
Viasakra refere organiza husi Proreitoria ba Asuntu Provedoria no Akonsellamentu (PRAPA), no dalan kruz ne’e hahú husi Kampus Liceu, liuhusi Kampus Kaikoli liubá Merkadu Lama, to’o Audian-Formosa no ikus liu remata iha Kampus Sentrál UNTL nian, Díli.
Partisipa husi Visereitór, Proreitór, Diretór-Jerál, Diretór Nasionál, Xefe Departamentu Funsionáriu sira, Dosente no Funsionáriu estudante tuan no estudante foun sira.
Média UNTL 📝 : Leonia de A. Da Costa
Foto 📷 : Julito Afons
- Detalhes
- Visualizações: 573
#TimorLeste #UNTL #FAGRI #COVID19 #COVID19TL 11 Abril 2022
Universidade Nacional Timor Lorosa’e (UNTL) liuhusi Fakuldade Agrikultura (FAGRI) nia Profesór Vicente de Paulo Correia, Ph.D eleitu ho votu 28, liuhusi eleisaun ne’ebé partisipa husi dosente Fakuldade nian na’in 51, enkuantu Profesór Carlos da Conceição de Deus ho votu 23, iha Salaun Enkontru FAGRI-UNTL nian Díli (08/04).
Dekanu eleitu liuhusi diskursu hato’o agradesimentu ba estrutura tomak Fakuldade nian tanba bele fó fiar ba nia hodi lidera Fakuldade Agrikultura ba períodu 2022-2026.
‘’Ha’u agradese ba Dekanu sesante ne’ebé halo ona servisu durante tinan haat ne’e, susesu no balun la susesu maibé ne’e mak prosesu ida, agora ba oin programa ne’ebé ohin ha’u apresenta kapas tebes maibé depende ba ita hotu nia preparasaun no servisu hamutuk atu bele lori Fakuldade ida ne’e sai diak liu’’, tenik Eis-Diretór CNIC.
Iha fatin hanesan, Visereitór ba Asuntu Pósgraduasaun no Peskiza (VRAPGP), Profesór Doutór Afonso de Almeida, Ph.D, ne’ebé representa Magnífiku Reitór, agradese ba Komisaun Organizadora tanba organiza atividade ho susesu hili fali Dekanu foun ba Fakuldade.
‘’Eleisaun ne’e hanesan asaun demokrátiku ida hala’o iha kualker intituisaun atu bele hili no halo mudansa ne’ebé diak ba ida ne’ebé diak liu tan, normalmente iha eleisaun ne’e momentu ida ne’ebé ita atu muda espetativa ita-nian liuhusi eleisaun ne’e hala’o hodi lori mudansa ba FAGRI’’, dehan Visereitór.
Prezidente Komisaun Organizador ba eleisaun, Profesór Marcolino Estevão Fernandes e Brito, hateten, eleisaun mak ho forma demokrátiku ne’ebé adopta hodi fó kompetensia ba ema ida hodi lidera instituisaun ne’e.
“Ita hotu hatene katak, dalan eleisaun diak liu hodi fó biban ba ema hotu ne’ebé partisipa iha eleisaun no atu ezerse sira-nia votu hodi hili Dekanu Fakuldade Agrikultura ba periodu 2022-2026”, hatutan.
Iha okasiaun ne’e, Dekanu sesante Profesór Carlito de Araújo Mali Code, Ph.D, entrega mós dokumentu ofisiál FAGRI nian ba dekanu eleitu. 
Iha primeira ronde partisipa husi dosente na’in 52, ho kandidatu na’in lima mak Profesór Vicente de Paulo Correia ho votu (18), Profesór Mateus da Cruz de Carvalho ho votu (1), Profesór Marçal Gusmão ho votu (10), Profesor Carlos da Conceição de Deus ho votu (13), no Profesór Agostinho da Cunha Moniz ho votu (10).
Husi rezultadu eleisaun konkore husi kandidatu na’in rua, Profesór Vicente de Paulo Correia ho votu válidu (28) ka 55%, no Profesór Carlos da Conceição de Deus ho votu válidu 23 ka 45%.
Partisipa husi Visereitór ba Asuntu Akadémiku no Garantia Kualidade (VRAGQ) Profesór Doutór Samuel Venâncio de Sousa Freitas, Visereitora ba Asuntu Estudantís (VRAE), Profesora Eng.ª Lígia Tomás Correia, M.Sc, Diretór ANAAA, Sr. Edmundo Viegas, Ph.D, Dekanu sesante ho Vise-dekanu sira, dosente no konvidadu sira.
Média UNTL 📝 : Laurindo da Cruz Gomes
Foto 📷 : Laurindo da Cruz Gomes