Universidade Nacional Timor Lorosa’e (UNTL) liuhusi Proreitoria Asuntu Kooperasaun (PRAK) hala’o sosializasaun prosesu aplikasaun bolsa interna UNTL ba ensinu sekundária sira iha Liquiçá liuliu ba finalista sira atu hatene bele aplika, bainhira admitidu sai estudante universidade nasionál nian.
“Ita-nia objetivu maka ne’e, sira ne’ebé finalista ne’e prepara atu ba universidade, bainhira sira tama iha UNTL mak sira iha ona koñesimentu ba bolsa sira ne’ebé hahú iha semestre impár, signifika semestre primeiru no segundu sira prepara didi'ak ona, atu nune'e bele hetan oportunidade ba bolsu estudu sira-ne'e.
Kritériu jerál mak sira tenke estudante UNTL, iha valór di’ak liu, iha nivel departamentu no fakuldade”, dehan Proreitór Asuntu Kooperasaun (PRAK), Profesór Tomé Xavier Jerónimo, iha Ensinu Secundária Católica São João de Brito Liquiçá (15/9).
Proreitór mós deskreve katak, bolsu estudu interna ne’ebé iha realiza ho apoiu husi Governu Xina, Japaun (Astomo Energy Coorporation no Osaka Gas Fundation), no Instituto Camões, inklui husi Governu liuhusi FDCH (Fundo Desenvolvimento de Capital Humano) naran Bolsa Hakbiit.
Koordenadór Interinu Eskola CAFE Liquiçá, Mestre Ildefonso Barreto agradese ba universidade liuhusi PRAK, tanba bele halo ona sosilizasaun ba estudante sira, liuliu prosesu no rekizitu sira ba bolsa sira ho apoiu internasionál nian.
“Espera bele motiva tan estudante sira hodi aproveita ho informasaun hirak ne’e, tanba atu tama iha UNTL mós tenke hetan valór di’ak, no atu hetan bolsa interna hirak ne’e mós presiza valór di’ak. Ha’u espera katak ami-nia estudante preparadu bazeia ba kritéria ne’ebé ohin hato’o husi universidade”, hatutan Mestre Barreto.
Iha fatin seluk Diretór Colégio Santo Inacio de Loiola Pe. Isaias Abilio Caldas, S.J agradese ba universidade tanba bele selesiona ona sira-nia eskola ba sosializasaun ne’ebé importante loos ba estudante sira.
“Agradese ba ita-boot sira hili ona ami-nia Colégio ba sosializasaun ne’e, espera estudante sira bele aproveita”, apresia Diretór.
Denavia Nerisa Correia dos Santos Estudante Eskola Café Liquiça agradese ba ekipa universidade nian, tanba bele partilla ona informasaun ba sira atu prepara liután hodi aplika bainhira liu iha UNTL.
“Ha’u kontente tebes. Ha’u garantia katak, sei liu iha UNTL entaun presiza estuda makas. Ne’e importante tebes mai atu konkore bolsa, bolsa sira hanesan ne’e atu finansia kustu estudu nian", hateten.
Sosializasaun ne'e hala’o ona iha Munisípiu Aileu, Ermera no Liquiçá, sei hala’o mós iha munisípiu seluk, inklui RAEOA.
Enkuantu iha atividade sosializasaun implementa husi Proreitór Asuntu Kooperasaun (PRAK), Profesór Tomé Xavier Jerónimo ho nia Ekipa. Partisipa husi profesór no estudante finalista sira husi Colégio Santo Incio de Loiola-Casait, Ensino Secundário Gerál No 1, Ensino Secundário Católica São João de Brito Liquiçá ho Café (Centros de Aprendizagem e Formação Escolar) Liquiçá.
Média UNTL 📝: Miguel Gonçalves & Aniceto Afonso dos Santos (estajiáriu)
Foto 📷: Miguel Gonçalves & Aniceto Afonso dos Santos (estajiáriu)