#TimoLeste #UNTL #FMCS #WHO #COVID19# COVID19TL 12 Outubru 2021 - Universidade Nacional Timor Lorosa’e (UNTL) nia Magnífiku Reitór Profesór dr. João Soares Martins MPH, Ph.D, asina Memorandu Entendimentu ho Organizasaun Mundiál Saúde (OMS-WHO), iha sala Video Konferénsia Kampus Sentral UNTL nian, Díli (12/10), hodi hametin kooperasaun institusionál ba futuru.
Magnífiku Reitór Profesór dr. João Soares Martins MPH, Ph.D, hatete, UNTL asina akordu ho OMS iha Timor-Leste, hodi hetan apoiu tékniku ba Fakuldade Medisina no Siénsia Saúde (FMCS).
“Ohin ita asina akordu ho OMS, maibé kolaborasaun UNTL hala’o antes ona no OMS mós apoiu ona ita, komputadór, livru, formasaun no peskiza iha área Medisina no Siénsia Saúde nian, tanba ne’e ba oin sei kontinua apoiu ita liuliu iha parte laboratóriu nian”, tenik Magnífiku Reitór
Reprezentante OMS nian iha Timor-Leste Dr. Arvind Mathur, hatete, asina akordu ho UNTL ne’e hanesan baze ida hodi apoiu iha programa tékniku, finanseiru no liuliu estabelese laboratóriu iha FMCS.
“Asina akordu ida ne’e ho durasaun tinan lima hanesan baze ida hodi hetan konkordansia ne’ebé sei apoiu orsamentu no apoiu tékniku sira inkliu mós iha parte biblioteka nian”, dehan Dr Arvind Mathur.
Partisipa iha serimónia asinatura MoU ne’e, Proreitora ba Asuntu Kooperasaun nian, Professora Doutora Lídia Gomes, SKM, M.Kes, Visereitór ba Asuntu Pós-Graduasaun no Peskiza, Profesór Doutór Afonso de Almeida, Diretór-Jerál Servisu Apoiu Reitoria, Sr. Jacinto Belo no ekipa tékniku sira.
Média UNTL 
: Leonia de A. da Costa
: Leonia de A. da CostaFoto 
: Leonia de A. da Costa
: Leonia de A. da Costa