#TimorLeste #UNTL #SFA #DhakaUniversity 05 Outubru 2021 - Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D. asina Memorandu Entendimentu (MoU) ho Universidade Dhaka, Bangladesh 🇧🇩, liuhusi ZOOM, atu koopera iha peskiza ho foku iha Edukasaun Inklusiva no Jéneru iha Timor-Leste.
“Ohin asina MoU universidade nasionál ho Universidade Dhaka kona-ba Jéneru Inkluzivu Pedagójiku, atu haree liu kona-ba inklusividade pedagójika iha ensinu nian kontekstu Timor-Leste nian”, tenik Reitór iha Sala Video Konferénsia UNTL nian, Díli (05/10).
iha fatin hanesan, Diretór Sentru Formasaun Avansada (SFA), Profesór Apolinário Magno, hateten Universidade Dhaka iha institutu ne’ebé halo peskiza iha área edukasaun.
“Universidade Dhaka ne’e iha institutu ida ne’e bolu (Institute of Education and Research) ka Institutu Edukasaun no Peskiza, sira-nia knar mak halo peskiza, entaun área ida sira halo mak edukasaun nian mak ita halo kooperasaun área edukasaun nian”, tenik Profesór Apolinário.
Profesór Apolinario hateten mós implementasaun MoU ne’e SFA sei envolve mós dosente sira iha Fakuldade Edukasaun, Arte no Umanidade (FEAH) no seluk tan.
Partisipa iha memorandu ne’e Visereitora Asuntu Estudantís, Profesora Eng. Lígia Tomás Correia, MSc, Proreitora ba Asuntu Kooperasaun, Profesora Doutora Lídia Gomes, Proreitór ba Asuntu Dezenvolvimentu Institusionál, Profesór Doutór Lelis Gonzaga Fraga, peskizadór sira no konvidadu sira.
Média UNTL 📝: Agostinho da Cruz e Silva
Foto 📷: Pio Belo Ximenes