UNTL -GABCEDU PROLONGA SUBMISAUN DOKUMENTU DOSENTE TO’O 30 OUTUBRU

GABCEDU 8

#TimorLeste #UNTL #GABCEDU #COVID19 #COVID19TL 05 Outubru 2021 - Universidade Nacional Timor Lorosa’e (UNTL) nia Gabinete Sertifikasaun Dosente Universitáriu (GabCEDU) aprezenta progresu, dezafiu no servisu ba Ekipa Reitorál hodi rona no adia tan loron ba entrega dokumentu nian to’o 30 Outubru, iha sala Vídeo Konferénsia UNTL nian, Díli (05/10).

Hafoin rona tiha aprezentasaun, Magnífiku Reitór, Profesór dr. João Soares Martins MPH, Ph.D agradese ba ekipa GabCEDU ne’ebé lidera husi Profesór Doutór Rui da Cruz ho nia servisu durante ne’e, no sei estende tan tempu ba dosente sira ne’ebé ladauk hatama sira nia dadus.

GABCEDU 1

“Agradese ba GabCEDU nia servisu, ita sei iha servisu lubuk bo’ot ida mak sei halo no sei iha tempu atu bele verifika didi’ak dadus sira ne’e, ita fó tan tempu to’o 30 Outubru ba dosente sira atu hatama sira-nia dadus”, tenik Reitór.

GABCEDU 2

Iha fatin hanesan, Diretór-Jerál GabCEDU Profesór Doutór Rui da Cruz iha nia entrevista hateten, objetivu hasoru malu ho ekipa reitorál ne’e atu aprezenta servisu GabCEDU nian durante ne’e.

“Ohin GABCEDU mai aprezenta nia progresu servisu durante fulan 8 nia laran, alkansa duni objetivu balun no balun iha hela prosesu nia laran no data rekolla dadus sei estende tan to’o 30 Outubru 2021” tenik Diretór-Jeráç.

Partisipa iha enkontru ne’e Visereitór, Proreitór, Diretór Nasionál no Xefe Departamentu GabCEDU ho nia funsionáriu sira.

Média UNTL 📝: Agostinho da Cruz e Silva
Foto 📷: Agostinho da Cruz e Silva