#TimorLeste #UNTL #DNAE #COVID19 #COVID19TL 21 Setembru 2021 - Universidade Nacional Timor lorosa’e (UNTL), nia Magnífiku Reitór, Profesór dr. João Soares Martins MPH, Ph.D, prezide universidade nia graduasaun ba dala XXIV (24) iha Auditóriu FECT-Hera UNTL (21/09), hodi mudansa fita no atribui diploma ba finalista na’in atus tolu haatnulu resin sia (349) ne’ebé preparadu ona atu integra ba komunidade hodi serbí.
Relasiona ho serimónia solene refere, Magnífiku Reitór liuhusi diskursu hateten ba graduadu sira katak, graduasaun momentu kulminante no selebra susesu inan-aman no oan sira-nian, tanba remata ona sira-nia estudu, hafoin tinan lubuk ida estuda iha universidade.
“Ohin ofisialmente universidade husik ona imi, hodi fila ba serbí komunidade no nasaun tuir matenek no kompeténsia akadémiku husi área oioin ne’ebé universidade oferta, tanba ne’e, ha’u tatoli ba imi atu uza matenek ne’e ho responsabilidade, hodi aplika no buka aprende liután ba idaidak nia futuru”, tenik Reitór.
Reitór mós agradese ba Sívitas Akadémika tomak universidade nian, ne’ebé dedika ona ba universidade no prepara ona fini liuhusi matenek ba graduadu sira no agradese mós ba inan-aman sira tanba la kolen tulun sira idaidak.
Iha fatin hanesan, Ministru Ensinu Superiór, Siénsia no Kultura (MESSK), S.E. Longuinhos dos Santos, ne’ebé reprezenta Governu hodi hato’o felisitasaun ba graduandu no inan-aman sira.
“Ohin ita komemora imi-nia susesu, koñesimentu sira imi hetan sai matadalan, hodi sai servidór iha futuru, nune’e, Governu liuhusi MESSK hatuur ona lema mak kualidade edukasaun mak futuru nasaun, liuhusi UNTL, tanba ne’e agradese mós ba lideransa Magnífiku Reitór, Sívitas Akadémika ne’ebé kria ona kondisaun pedagójika no lojístika, tulun sira-nia perkursu akadémiku tomak”, hatutan Ministru.
Governante ne’e, hatutan tan katak MESSK sei kontinua apoiu universidade nasionál hodi asegura kondisaun sira ba ensinu no aprendizajen, nune’e bele prepara foin sa’e sira, preparadu liután partisipa iha prosesu dezenvolvimentu.
Reprezentante graduadu, Moises Soares Magno, agradese ba apoiu no dedikasaun tomak husi família, no sivitas akadémika tomak ne’ebé fó ona apoiu ba graduadu idaidaik durante prosesu estudu iha universidade.
“Ami-nia agradese ba ho Sívitas Akadémika tomak, ba ami-nia dosente sira, funsionáriu sira, pesoál limpeza, seguransa sira, nomós estrutura universidade nian, husi Magnífiku Reitór atuál no Magnífiku Reitór sesante sira, ami-nia inan-aman, enkarregadu sira ne’ebé fó ona apoiu direta no indireta”, dehan Moises.
Partisipa iha eventu ne’e, Ministru Agrikultura no Peska, S.E Pedro Reis, Prezidente Instituto Nacional de Ciência e Tecnologia, Sr. José Cornélio, Ph.D, Diretór Ezekutivu ANAAA, Sr. Edmundo Viegas, Ph.D, reprezentante Komisaun G Parlamentu Nasionál, Deputada Domingas dos Santos, Amu Kapelaun UNTL, Pe. Nivio Lebre Correia, Fdcc, dosente, funsionáriu, inan-aman, graduadu, no konvidadu sira.
Média UNTL 📝 : Miguel Gonçalves
Foto 📷 : Agustinho da Cruz e Silva, Estajiáriu; Denilson A. Barros, Artur Ramos, Leonia de Araujo