#TimorLeste #UNTL #MEJD #INFORDEPE #COVID19 #COVID19TL 22 Jullu 2021
Universidade Ncional Timor Lorosa’e (UNTL) nia Magnífiku Reitór Profesór dr. João Soares Martins partisipa iha abertura estájiu pedagójika ba estudante sira na’in rihum rua atus lima sianulu resin tolu (2593), ne’ebé kompleta ona teoria iha kursu Baixarelatu husi Instituto Nacional de Formação Profisionais da Educação (INFORDEPE) nian, iha Salaun Ian Martin Balide Dili, (22/07).
“Agradese ba Governu tanba bele fó Konfiansa mai UNTL hodi envolve no formadór sira ba iha formasaun ida ne’e, no liuhusi kooperasaun entre instituisaun UNTL, INFORDEPE no Ministeriu Edukasaun Juventude no Desportu bele realiza formasaun ho diploma baixarelatu”, tenik Profesór.
Magnífiku Reitór mós enkoraja ba estajiariu sira atu nafatin iha vontade no labele lakon esperansa maské ho idade ne’ebé avansadu ona maibé aprende laiha limiatasaun ba idade.
Iha fatin hanesan Ministru Edukasaun Juventude no Desportu, Profesór Doutór Armindo Maia hateten halo abertura estajiu pedagójiku ba formandu sira ne’ebé durante ne’e partisipa iha formasaun hodi ba aplika teoria ne’ebé aprende ona.
“Ohin halo abertura estájiu pedagójika ba ita-nia formandu ne’ebé durante tinan tolu resin sira tuir formasaun hamutuk entre MEJD ho UNTL hodi realiza formasaun iha territóriu tomak no ohin sira aplika teoria iha terrenu”, tenik Ministru.
Formasaun ne’e realiza tanba servisu hamutuk entre UNTL ho MEJD liuhusi nia INFORDEPE hodi fó formasaun ba Manorin Na’in sira husi Ensinu Pre-Sekundáriu no ensinu Sekundáriu.
Partisipa iha Serimómia ne’e Diretór Jerál ba Asuntu Administrasaun Akadémika Sr. Armindo Leto Fátima, Dekana Fakuldade EdukasaunArte no Umanindade Dra. Ana Cristina de J. Martins ho nia estrutura, Vise-Ministru Edukasaun Juventude no Desportu Dr. António Guterres, Presidente Infordepe Sr. Manuel G. de Araujo ho nia estrutura no konvidadu sira.
Média UNTL : Agostinho da Cruz e Silva)
Foto : Agostinho da Cruz e Silva