UNTL SUBMETE ONA DADUS ESTUDANTE NA’IN 23.500 BA MESSK ATU HETAN SUBSÍDU

217399887 4288483601172992 676165526113933774 n

#TimorLeste #UNTL #VRAAGK #MESSK #COVID19 #COVID19TL 14 Jullu 2021

Universidade Nacional Timor Lorosa’e (UNTL), nia Visereitór ba Asuntu Akadémiku no Garantia Kualidade (VRAAGK), Profesór Doutór Samuel Venâncio de Sousa Freitas, iha Kampus Sentrál UNTL nian, Díli (13/07), hateten, universidade submete ona lista estudante nian, rihun ruanulu resin tolu atus lima (23.500), ba Ministériu Ensinu Superiór, Siénsia no Kultura (MESSK) hodi asesu subsídiu.
“Dadus hirak ne’e ita rekolla diretamente husi administrasaun universidade nian, bazeia ba estudante ativu ne’ebé naran tama iha sistema ho totál 23.500, Reitór asina no submete ona ba Ministériu Ensinu Superiór, Siénsia no Kultura (MESSK), hodi prosesa subsídiu propinas no pulsa ba universitáriu sira durante implementasaun Serka-Sanitária (SS)”, tenik Visereitór.

Profesór Samuel mós hateten, subsídiu propinas ne’e selu tuir kustu ba estudante nian ne’ebé selu ba universidade, no ba universitáriu ativu sira iha UNTL U$ 30.00, no livre teoria U$5.00.
“Subsídiu sei fó tuir estudante ida-idak nia kustu pagamentu, sira ne’ebé ativu U$ 30.00 no livre teoria selu de’it ho U$5.00 maibé nia prosesu kleur oituan tanba atu selu pulsa ba estudante sira presiza hatene númeru telefone maibé solusaun ne’e oinsá, ita hein desizaun MESSK”, hateten Profesór Samuel.

Média UNTL : Leonia Araújo (Estajiária)
Foto : Altur Ramos ( Estajiáriu)