UNTL NIA PROFESÓR SIRA KONTINUA ORIENTA PROPOSTA NO MONOGRAFIA LIUHUSI “ONLINE”

Universidade Nasional Timor Lorosa’e (UNTL), nia dosente sira nafatin orienta estudante sira ne’ebé dadaun ne’e hakerek hela proposta no monografia liuhusi via-dijitál (online) durante implementasaun Serka-Sanitária (SS), iha Munisípiu Díli.
 
“Universidade permite atu dosente sira kontinua fasilita estudante sira, liuhusi online hodi fasilita orientasaun ba proposta no monografia, bele kontaktu diretu maibé limite ba ema na’in rua de’it no kumpri regra hanesan fase liman, uza máskara no distansiamentu fíziku ” dehan Visereitór Asuntu Akadémiku no Garantia Kualidade Profesór Doutór Samuel Venâncio de Sousa Freitas iha knaar fatin (20/04).
 
Profesór Samuel hatutan, regra Serka-Sanitária bandu ema la halibur malu, maibé sei iha meiu seluk hodi fasilita estudante sira sira-nia prosesu aprendizajen, liu-liu ba sira ne’ebé atu finaliza ona proposta no monografia.
 
Iha sorin seluk, Profesór Graciano Soares Gomes, husi Fakuldade Agrikultura (FAGRI) hateten, durante aplika Serka-Sanitária nia parte uza via-online hodi orienta estudante sira ne’ebé hakerek proposta no monografia, inklui aula ba estudante sira (aula online).
 
“Bainhira orienta estudante sira ne’ebé hakerek hela proposta no monografia, ha’u uza projetór iha uma depois hatudu ba estudante no marka ho simbolu ruma iha liafuan ka fraze sira ne’ebé, karik estudante sira la komprende sira bele husu hodi hetan klarifikasaun, durante ne’e ha’u orienta ona estudante na’in sanulu (10) no nain neen (6) prontu ona atu ezame” tenik atual Vise Dekanu III FAGRI.
 
Profesór ne’e mós rekomenda ba nia maluk dosente sira katak, difikuldade ne’ebé hasoru tenki konsidera hanesan oportunidade hodi aprende liután ho meiu (WhatsApp, Facebook, Zoom, Google Meet no seluk tan) no labele rende ba situasaun ruma, karik hein de’it susar atu halo buat ruma no susar atu hetan mudansa.
 
Média UNTL 📝 : Leonia Araujo (Estajiária)
Foto 📷 : Leonia Araujo(Estajiária)