UNTL HAHÚ DISKUTE PLANU ASAUN ANUÁL 2022 NIAN

Universidade Nacional Timor Lorosa'e (UNTL) liuhusi Viserereitór ba Asuntu Planu, Finansa no Administradór-Jeral (VAPFAJ) hahú hala’o workshop hodi diskuti Planu Asaun Anual 2022 nian, bazeia ba Programa VIII Governu nian (Programa Jéneru, Programa Dezenvolvimentu Institusionál no Programa Ensinu Superiór), antes submete ba Ministériu Finansa (MF) ho Unidade Planeamentu Monitorizasaun no Avaliasaun (UPMA) Gabinete Primeiru-Ministru nian.

 

“UNTL hetan premisaun husi Magnífiku Reitor, atu kria sesaun traballu durante loron rua (27-28/04) hodi akumula ideia sira nomós halo replikasaun husi planu 2021 hodi enkaixa iha 2022, no ajusta ho Planu VIII Governu nian”, hateten Visereitór Asuntu Planu, Finansas no Administradór-Jerál Profesór Helio Augusto da Costa Xavier Mauquei, Ph.D iha Auditóriu Liceu UNTL, Díli (27/4).

 

Profesór Helio mós hatutan, rekursu ne’ebé universidade iha mak fahe informasaun liuhusi média sosiál hanesan WhatsApp no seluk tan hodi realiza sesaun traballu ne’e responde ba ezijénsia Governu nian.

Entretantu, Diretór Nasionál Planeamentu no Finansa (DNPF), Sr. Egídio dos Santos Filipe hateten, sesaun traballu refere importante tanba hodi halo preparasaun planu anual 2022 nian.

 

“Sesaun ne’e importante tebes hodi informa ba Fakuldade sira kona-ba preparasaun Planu Asaun Anual 2022, tanba tuir orientasaun VIII governu nian kona-ba Planu Estratéjiku Dezenvolvimentu Nasional (PEDN), katak Planu 2022 sei replika fali husi 2021 tuir programa tolu governu nian ne’ebé mensiona iha leten”, tenik Diretór DNPF.

 

Diretór Egídio mós hatutan, iha enkontru ne’e mós liga ba programa Reitór UNTL nian, ne’ebé apresenta ona iha nia kampaña hodi halo ajustamentu tuir programa Governu nian.

 

Partisipa sesaun traballu ba loron dahuluk, Magnífiku Reitór Profesór dr. João Soares Martins, MPH, Ph.D, Visereitór Assuntu Akadémiku no Garantia Kualidade, Profesór Doutór Samuel Venâncio de Sousa Freitas, Proreitór Asuntu Planeamentu, Monitorizasaun no Avaliasaun, Profesór José Nelson Salsinha, Ph.D, Proreitora Asuntu Kooperasaun, Profesora Doutora Lídia Gomes, SKM, M.Kes, Dekanu Fakuldade Agrikultura, Fakuldade Edukasaun, Arte no Umanidade, Fakuldade Ekonomia no Jestaun, Fakuldade Medisina no Siénsia Saúde no Fakuldade Enjeñaria, Siénsia no Teknolojia.

 

Média UNTL : Mateus Gonçalves

Foto : Mateus Gonçalves