UNTL NIA EKIPA SIMU ONA FOOS HUSI INSTITUISAUN NO PESOÁL BALUN

Escrito por Mateus Goncalves Visualizações: 672
Universidade Nacional Timor Lorosa’e (UNTL), nia Ekipa Reitoria no Ekipa Visereitoria ba Asuntu Estudantíl nian, ho apoiu hosi Diresaun Nasionál Lojístika na Manutensaun, simu ona apoiu foos husi instituisaun sira no indivídu balun, atu distribui ba estudante sira mak hela iha alojamentu “kos”, maibé seidauk simu foos husi apoiu husi Ministériu Solidariedade Sosiál no Inkluzaun (MSSI) husi foos saka hamutuk 5.346 ne’ebé UNTL simu ona.
 
Ekipa sei nafatin atende no rejista pesoál no instituisaun ruma ne’ebé hakarak apoiu universidade nasionál nia estudante sira, bele lori ho forma (foos 25Kg), no tuir kbiit ne’ebé iha, mai iha Kampus Sentrál, to’o 16 abril 9h00TL, iha sala-15 (Fakuldade Direitu).
 
Iha biban ne’e solisita mós ba dosente, funsionáriu inklui instituisaun no individu balun ne’ebé hakarak fó apoiu bele kanaliza mai iha Ekipa, no hafoin sei rekolla hamutuk hodi koordena ho estudante ka rezidente kos sira atu mai simu, hodi sira bele enfrenta Serka-Sanitária no Inundasaun ne’ebé akontese iha Díli 4 abril liubá.
 
UNTL nia estudante ne’ebé hela iha “kos” no seidauk simu foos rejista ona rihun ida resin (1000+). Enkuantu dadaun iha instituisaun no pesoál balun mak entrega ona sira-nia apoiu ba iha Ekipa atendimentu iha Kampus Sentrál dezde 13 abril, no sei permite to’o 16 abril 2021.
 
Média UNTL 📝 : Agostinho da Cruz e Silva
Foto 📷 : Agostinho da Cruz e Silva