UNTL-FCS NIA ESTAJIÁRIU DCS HALO APREZENTASAUN RELATÓRIU NO REZULTADU MONITORIZASAUN

 estudantes FCS

#TimorLeste #UNTL #FCS #MinistériodaJustiça #JapanEmbassyinTimorLeste #SECOMS #UnicefTimorLeste 5 Marsu 2021
Universidade Nacional Timor Lorosa'e (UNTL) liuhusi Fakuldade Siénsia Sosiál (FCS) nia finalista Departamentu Komunikasaun Sosiál (DCS) aprezenta relatóriu Estájiu Servisu Sosiál (ESS), no iha fatin hanesan aprezenta mós rezultadu monitorizasaun ne’ebé foku ba programa rejistu moris iha rádiu komunidade.

Atividade ESS no monitorizaun ne’ebé hala’o mak Honorio Guterres iha Rádiu Komunidade Baucau, Elias da Costa (Rádiu Komunidade Manatutu), Celina Lopes (Rádiu Manufahi), Emerenciana Martins (Rádiu Café, Ermera), Leonia de Araújo (Rádiu Cova Taroman, Suai), Francisco Colo (Rádiu Komunidade, Vikeke).

Relasiona ho aprezentasaun ba atividade refere Diretór Akadémiku DCS nian, Profesor Marcelino Ximenes Magno, M.A, agradese ba parte hotu ne’ebé servisu hamutuk ho UNTL hodi apoia estudante sira ba estájiu durante loron 22 iha lokál ne’ebé tarjetu.

“Agradese ba Ministériu Justisa, Sekretáriu Estadu Komunikasaun Sosiál (SECOMS), Unicef Timor-Leste, jestór radiu komunidade sira no Governu Japaun ne’ebé apoia programa ne’e, liuhusi haruka ami-nia finalista na’in neen ba estájiu iha munisipiu”, hatete Diretor DCS.

Iha fatin hanesan, Diretór Diresaun Nasionál Servisu Rejistu no Notariadu, Sr. João Pereira, mós apresia ba esforsu estudante sira-nian, to'o rekolla dadus bele ajuda Governu iha programma rejistu moris ka sertidaun moris.

“Ami apresia tebes ba rezultadu ne’ebé estajiáriu sira rekolla, no ba oin ami sei haruka funsionáriu balu bele halo atendimentu iha postu administrativu hodi hafasil komunidade asesu ba sertidaun moris”, dehan Diretór João.
Estajiária Celina Alves Lopes hateten katak programa hala’o mak produs programa rádiu, halo monitorizasaun, sosializasaun inklui prepara Nota de Entendimentu hodi kontinua hametin kooperasaun entre Rádiu Komunidade no Diresaun Servisu Rejistu no Notariadu.

“Ohin loron ami aprezenta relatóriu no rezultadu ba parseiru sira no estrutura Departamentu, no durante loron 22 ne’e ami hetan esperiénsia relevante tebes ba ami-nia estudu, no partilla mós ami-nia koñesimentu ba komunidade liuhusi rádiu komunidade”, tenik Celina.

Programa refere hala’o tanba UNTL serbisu hamutuk ho Unicef, Ministériu Justisa, SECOMS, no Embaixada Japaun iha Timor-Leste haruka estajiáriu ba hala’o estájiu iha Rádiu Komunidade sira durante loron 22 hahú husi 6 to’o 28 fulan Novembru 2020.

Partisipa husi Ministériu Justisa, Diretor Nasionál Rejistu no Notariadu, Sr. João Pereira, reprezentante SECOMS, Sr. José da Costa, reprezentante Embaixada Japaun iha Timor-Leste, Sra. Misatu Taki, reprezentante Unicef, Sr. Ruksan Ratnam, no dosente estudante, inklui konvidadu sira.

Média UNTL 📝: Leonia de Araujo (estajiária)
Foto 📷: Domingos Soares (estajiáriu), Arkivu DCS