#TimorLeste #UNTL #FECT 5 Marsu 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins MPH, Ph.D, hamutuk ho sívitas akadémika tomak presta omenajen ikus ba matebian Visereitór ba Asuntu Pós-Graduasaun no Peskiza, Profesór Doutór Eng. Grabriel Antonio de Sá, M. Sc, ne’ebé hala’o visita ikus iha Kampus Sentrál UNTL nian, Díli (4/3).
Iha matebian nia vizita ikus ne’e, Reitór hateten hanesan oportunidade ba estudante, dosente no funsionáriu sira hodi presta omenajen.
“Iha Matebian nia vizita ne’e, lori naran universidade nasionál nian hakarak hato’o ita-nia sentidu kondolénsia ba ita maun, belun no mestre ne’ebé husik ona ita, maské ninia isin la hamutuk ona ho ita maibé nia espíritu nafatin horik ho ita”, tenik Reitór.
Profesór João Martins mós hato’o agradese ba kontribuisaun hahú nia haknar-an iha universidade to’o jornada ikus, ho mandatu hanesan Visereitór ba Asuntu Pós-Graduasaun no Peskiza no husik hela família, no sívitas akadémika tomak iha tempu ne’ebé UNTL presiza hela nia prezensa.
Matebian Profesór Gabriel nia visita iha Kampus Sentrál, no kontinua ba misa bensaun iha Kapela São João Paulo II, iha Fakuldade Enjeñaria Siénsia no Teknolojia (FECT), Hera-Díli, iha ne’ebé diriji Misa husi Amu Kapelaun UNTL Pe. Nívio Lebre Correia Fdcc, hafoin estrutra FECT nian presta omenajen antes matebian ba deskansa ikus iha nia moris fatin iha Bucoli, Baucau.
Matebian ho naran kompletu Gabriel António de Sá, moris iha loron 28 fevereiru 1964, iha Suku Bucoli, Postu-Administrativu Baucau, Munisípiu Baucau, no fila hikas ba Aman-Maromak hodi deskansa ho pás iha 3 marsu 2021, ho idade 57 anos.
Kualifikasaun akadémika: Profesór Gabriel foti kursu baixarelatu Enjeñaria Mekánika iha Institute Tecnology of Bandung-Indonézia, (Politeknik ITB), lisensiatura iha área enjeñaria Mekánika, Universidade Jenderal Achmad Yani, (UNJANI) Cimahi (1997-2000).
Matebian kontinua kursu mestradu iha Enjeñaria Mekánika, husi Universidade Aveiro, (2007-2010), doutoramentu nian iha área Sistemas Energético e Alterações Climáticas, iha Universidade de Aveiro (2015-2018).
Dedikasaun durante sei moris:
Durante moris, matebian hanesan Dosente iha UNTL dezde 2000, no hetan fiar husi universidade hodi asumi kargu hanesan Diretór Departamentu Enjeñaria Elektrónika, FUP-UNTL (2001-2004) iha FECT, asumi mós kargu hanesan Vise-Dekanu ba Asuntu Akadémiku FEST, no iha tinan 2006 to’o 2007 asumi knar hanesan Dekanu FEST nian, iha altura ne’ebá.
Hahú husi tinan 2010 to’o 2011, hetan fiar husi Universidade hodi asumi knar hanesan Koordenadór Lokál Poscavet em Timor-Leste Kooperasaun entre UNTL ho Universidade do Minho, matebian ba dalarua asumi hikas kargu Dekanu FEST iha tinan 2011 to’o 2015, hafoin asumi hikas knar iha Universidade hanesan Diretór-Jeral do Gabinete Sertifikasaun Dosente Universitáriu, 2020-2021.
Antes husik hela família no sívitas akadémika tomak, matebian mós hetan konfiansa husi Magnífiku Reitór UNTL nian hodi simu pose iha 29 janeiru 2021 hanesan Visereitór ba Asuntu Pós-Graduasaun no Peskiza.
Profesór Doutór Gabriel hakotu nia jornada ikus ho pozisaun hanesan Visereitór ba Asuntu Pós-Graduasaun no Peskiza ba períodu 2021-2026.
Maromak presiza nia, hodi husik hela sívitas akadémika tomak ho família iha loron 3 fulan Marsu 2021. Agradese ba dedikasaun tomak. Adeus Profesór Gaby.
Média UNTL 📝: Agostinho da Cruz e Silva
Foto 📷: Moises do Rego, Artur Ramos (Estajiariu)