#TimorLeste #UNTL #PRAPA 2 Marsu 2021
Universidade Nacional Timor Lorosa’e (UNTL) nia Proreitoria ba Asuntu Provedoria no Akonsellamentu (PRAPA), nia Amu Kapelaun, Pe. Nivio Lebre Correia, Fdcc, iha Kampus Sentrál UNTL nian, Díli (1-03) hateten katak PRAPA iha programa esensiál atu fasilita sívitas akadémika tomak (estudante, dosente no funsionáriu).
“Programa akonsellamentu nian, esensiál no integradu iha universidade atu tulun sívitas akadémika tomak ba progresu formativu no kontinua akompaña, inspira no eleva kapasidade umana nian, iha prosesu estadia”, tenik Pe. Nívio.
Pe. Nívio hatutan katak Gabineti Akonsellamentu prontu nafatin simu estudante, dosente no funsionáriu ne’ebé presiza tulun esperituál no motivasaun liuliu hasoru problema ruma bele hakbesik ba gabinete hodi hetan akonsellamentu.
“Estudante sira ne’ebé iha situasaun problema nia laran, ligadu situasaun psikolójika, desizaun ne’ebé difisil, asuntu sosiál sira, Gabinete PRAPA prontu simu no tulun hodi bele asegura atu fó dalan formativu ba vida umanu nian”, dehan Pe. Nívio.
Amu Kapelaun mós enkoraja ba sívitas akadémika, iha problema ruma labele sente mesak maibé hakbesik an ba PRAPA UNTL nian atu hetan tulun hodi sai husi problema ne’ebé hasoru.
Média UNTL 📝: Denilson A. Barros (estajiáriu)
Foto 📷: Denilson A. Barros (estajiáriu)