UNTL-FAGRI ESTUDANTE SIRA 73 PRÁTIKA ESTENSAUN AGRIKOLA IHA SUKU METAGOU 

Escrito por Mateus Goncalves Visualizações: 11448

Estudante12 

#TimorLeste #UNTL #FAGRI 15 Fevereiru 2021
Universidade Nacional Timor Lorosa’e (UNTL), husi Fakuldade Agrikultura, Departamentu Agro-Sosio Ekonomia nia estudante na’in hitunulu resin tolu (73), hala’o prátika Estensaun Agrikola iha Suku Metagou, Postu Administrativu Bazartete, Munisipiu Liquiçá (11 to’o 14 fevereiru 2021).

Relasiona ho prátika refere Profesór Gil da Conceição, iha kampus Sentrál UNTL nian, Díli (11/02), informa katak objetivu husi prátika ne’ebé hala’o atu aplika teoria ne’ebé estudante sira aprende ona iha disiplina Estensaun Agrikola.

“Prátika ne’e parte ida atu haklean teoria ne’ebé estudante sira hetan iha banku estudu, liuliu iha matéria Estensaun Agrikola atu bele identifika problema ne’ebé komunidade enfrenta iha Suku Metagou, nune’e sira mós bele fahe siénsia ne’ebé hetan ona ba komunidade”, tenik Profesór Gil.

Profesor ne’e dezeja katak prátika ne’ebé hala’o estudante sira bele konsentra iha lokál durante loron ha’at atu fó formasaun hanesan ema estensionista nomós bele fó informasaun, ideia ba grupu agrikultór sira identifika problema no buka solusaun hamutuk ho komunidade.

Estudante1 

Enkuantu pratikante, Milenia Leonor de Carvalho Guterres hateten katak liuhusi prátika refere bele haklean teoria ne’ebé hetan iha nível universitáriu.

“Liuhusi materia ne’e (Estensaun Agrikola), ami aprende iha teoria no prátika importante prepara ami atu fahe informasaun ba grupu agrikultór sira atu bele identifika problema no ami fahe hanoin atu buka solusaun ba problema ne’ebé sira hasoru iha Suku Metagou”, tenik Milenia.

Milenia Leonor de Carvalho Guterres mós ho esperansa katak liuhusi informasaun ne’ebé sira fahe bele ajuda komunidade agrikultór sira muda sira-nia sistema iha estensaun agrikola.

Atividade prátika ne’ebé hala’o estudante pratikante na’in hamutuk hitunulu resin tolu (73) ne’e dezloka ba lokál, iha 11 to’o 14 fevereiru 2021, no kompaña husi sira-nia Profesór Gil da Conceição.

Média UNTL 📝: Denilson A. Barros, Altur Ramos (estajiáriu)
Foto 📷: Arkivu Estudante estajiáriu Departamentu Agro-Sosio Economia.